Baandert

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, es te dit dialek sjpriks.

---

De ligking vanne Baandert in Zitterd-Gelaen.

De Baandert is 'n woonwiek in 't naorde van Zitterd. Dees wiek is veural bekèndj es naamgaever van 't veurmaolig vootbalstadion.

Ligking

De wiek wuuertj ane naordelike kantj begrens door 't recreatiegebied de Sjwienswei. In 't oeaste grens 't ane wiek Sjtadbrouk, in 't zuje aan 't centrum van Zitterd en in 't wèste ane wiek Euverhaove, wovan 't gesjeie wuuertj dore Gelaenbaek.

Gesjiechte

Veure Twieëdje Werreldkrieg besting 't gebied vanne Baandert nag vriewaal gans oet akkeren en weilenj mit allein get versprèdje beboewing. De naam Baandert woort indertied al gebroek veur dit gebied mit aan te gaeve. 't Gebied woort doorsni-jje dore Meulebaek, 'n kónsmaesig aangelagdje aaftakking vanne Gelaenbaek die nao de Sjtadbroukermeule lèdje. Dees baek, die door häör vreuger functie es aop riool inne vouksmóndj ouch waal bekèndj sting es de Keutelbaek, is biejen aanlag vanne wiek veur e groeat deil euverkluus. Langs de baek loog 't gehuch Sjtadbrouk, det gans inne hujige wieke Baandert en Sjtadbrouk is opgegange. Inkel historische häöf en hoezer van dit plaetske, anen Awwewaeg, zeen huuj nag bewaardj gebleve.