De Aw Kèrk

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Sjpawbiks, es te dit dialek sjpriks.

---

De neogotische kapel van de heilige Anna

De Aw Kèrk (Nederlands: De Oudekerk) ies 'n buurtsjap van Sjpaubeek in de gemeinte Baek in Zuud Limburg. De beboewing ies gelege noordelik van de autobaan A76 van Heerle nao Gelaen-Zittert. De naam kump van de oarsjprónkelike (ouw) kèrk van Sjpawbaek, die hie tot 1837 gesjtange haet. Ouch de Annakapel, die ziech hie noe bevingk weurt door de luuj de ouw kèrk geneump. Dao liegke 30 hoezer.

Bezeenswaerdig

• 'n Neogotische kapel, gewiejd aan de heilige Anna, ies in 1866 geboewd op de plaats van de ouw parochiekèrk, oet piëteit veur de doaje die op 't kèrkhof begrave loge. In 1989 woort de kapel gerestaureerd. Tege 'n boetemoer sjteit 'n geetiezere weegkruus mèt de teks: "Onverwach sjteiste veur mich".
• Vlak bie de kapel ies 'n opeloch-sjtein-tentoansjtèlling gelege, woabie 't óntsjtoon van 't regionaal landsjap weurt aangetuènd. 't Ies aangelag door 't IVN aafdeiling Sjpawbaek.
• Kesjtièl St. Jansgelaen, woavan de veurbörch en haof nog besjtoon. 't Good ies geboewd in 1570 neve 'n watermeule oet de 14e ièw op de Gelaenbaek. 't Hoofgeboew haet 'n mansardekap en ies opgetrokke in baksjtein mèt mergelbeng, de zogeneumde sjpeklaoge.
• 't Kloaster of veurmalig retraitehoes en asielzeukersjcentrum vèlt gedeiltelik ónder de gemeinte Sjènne. 't Ies geboewd van baksjtein mèt geblokde heuk. Eine gevel haet aafwieselend róndbaog- en rechheukige vènstere en 'ne voluutvörmige tuup.