't Lömmerigerveld

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, es te dit dialek sjpriks.

---

De ligking van 't Lömmerigerveld.

't Lömmerigerveld (Nederlandjs: Limbrichterveld) is 'n wiek van Zitterd inne gemèndje Zitterd-Gelaen inne Nederlandjse pervinsje Limbörg. Dees woeanwiek is inne ieëste helf vannen twintjigsten ieëf óntstangen es 'n arbeiderswiek veure spaorwaegarbeiders van 't rangeerterrein in Zitterd en is oetgegreudj toet 'n modern stadswiek mit róndje 5.715 inwoeaners (2013).

Ligking

't Lömmerigerveld is 'n woeanwiek gelaengen in 't wèste van Zitterd, grenzendj ane naordeliken en wèstelike stadsrandj. t'n Naorde vanne wiek bevindj zich 't netuurgebied de Lömmerigerbós. Wiejer wuuertj 't Lömmerigerveld in 't oeaste begrens dore spaorlien Mestreech - Venlo, die de grens vörmp mit 't Industrieterrein Naord, de wiek Euverhaoven en 't centrum. 't Is de ènsigste woeanwiek van Zitterd die t'n wèste van dees spaorlien ligk. Zujelik vanne wiek bevindj zich 't Kantoearepark en 't Hanjelscentrum Bergerwaeg en in 't wèste löp de provinciale waeg N276, dae de grens vörmp mit 't dörp Lömmerig. Midde dore wiek löp 'n geujerspaorlien die Zitterd mit 't havegebied van Bór verbindj.

Gesjiechte

Toet inne ieëste helf vannen twintjigsten ieëf waas 't Lömmerigerveld 'n aop agrarisch gebied det Zitterd en Lömmerig vanein sjèdje en waas hie bao gein beboewing. De ieëste stadsoetbreijinge vónjen hie plaats róndj 't jaor 1900 es gevolg vannen aanlègk van e rangeerterrein in Zitterd. De spaorwaegarbeiders en masjeniste die hie wirkdje woorten in dit gebied gehoesves in nuuj arbeidersweuning. Veur 't greujendj aantaal aan arbeiders op te vange woort hie later, tösse 1921 en 1924, de "Sjpaorkóllenie" aangelag.

De veurnaamste oetbreijinge vónjen inne twieëdje helf vanne jaore 1960 enne ieëste helf vanne jaore 1970 plaats, mitte boew van twieë nuuj woeanbuurte en vieg hoeagboewflats. E deil vanne aaj Sjpaorkóllenie haet hieveur mótte wieke. Bie dees stadsoetbreijinge is de "Auveleberg", vermeujelik 'ne Romeinse graafhäöel, gans aafgegrave. Inne jaore 2000 verrees t'n naorde vanne geujerspaorlien de nuujboewwiek "Hoogveldj". Biejen aanlègk van dees wiek is e graafveld oeten iezertied óntdèk mit róndje 120 graver.

In december 2012 is me begós mitte sanering vanne aaj Sjpaorkóllenie, went de weuninge verkieërdje in 'n slechte staot. De karakteristieke veurgevele vanne weuninge zeen hiebie es industrieel irfgood gespaardj gebleve.