Soiron

Van Wikipedia
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Soiron, dörpsgeziech

Soiron (Waals: Sweron) ies 'n dörp en deilgemeinte op 't Belsj in Wallonië. Saer 1977 huèrt 't bie de gemeinte Pepinster in de provincie Luuk.

Historie[bewirk | brón bewèrke]

Soiron ies gesjtiech in 1005.

Bezeenswaerdig[bewirk | brón bewèrke]

't Dörp huèrt bie de categorie: Les plus beaux villages de Wallonie vanwege zien good bewaarde sjträötsjes vol ouw, gries natuursjteine hoezer oet de 17e en 18e ièw. Vènstere en deure höbbe lateie en/of kruzer van helsjtein. De daker zint gedèk mèt leie. 'n Ouw wesjplaats, besjtaonde oet ‘ne viever mèt wesjtrap, ’n pómp en ’n wesjhuuske mèt ’ne róndbaog en ’n bad binne, bevingk ziech ónder aan de kèrkheuvel. 't Water kump oet 'n brón. In 1983 ies dit allenei gerestaureerd. De kèrk, oet 1723, ies gewiejd aan de heilige Rochus. ’t Geboew haet ‘ne ouwere sjpietse tore mèt ’n groat sjeep van later datum.

't Kesjtièl van Soiron, opgetrokke in natuur- en helsjtein, tösje 1723 en 1749, haet twiè tores. 't Bevingk ziech aan de rand van de beboewing, gelege in 'n park. Binne sjteit meubilair in Lodewiek XIV-sjtiel. Bie de aanliegkende boerderie sjteit 'n druègsjuur oet 1836, woa in vreuger jaore, toen de textielindustrie in 't dörpke nog bleujde, kaardebolle woorte gedruèg. Mèt die kaardeböl woort de wöl gekemp. De veurgevel van dees sjuur haet miè es 90 ventilatieloker. De textielindustrie besjtóng oet sjpinnerieje en weverieje.

In de buurt van 't kesjtièl sjteit 'n Rochuskapelke. Wiejer zin d’r nog 'n aantal Mariakapelkes, de ouw pastorie en 'n veurmalige beerbroewerie te zeen.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Soiron&oldid=340960"