Sinselbaach
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Parteis, es te dit dialek sjpriks.
De Selzerbaach, ofwaal Sinselbaach, Selzerbaek of Sinzelbeek ies 'n baek, die sjtruimp van achter Vaols riechting Partei, woa ze in de Geul oetmóndt. Ónderweeg vörmp ze (sóms) de Duutsje grens. Ze löp parallel aan de riekswaeg van Aoke nao Gulpe. Vanaaf Vaols passeert ze ièrsj Oud Lemiers (hie sjteit de Lemierser watermeule en liegke de grachte van kesjtièl Lemiers), dan door Mameles, Nieswiller, Wahlwiller en Partei.
't Gehuch Sinselbaach (Nederlands: Sinselbeek), woa de baek ouch doorsjtruimp, ies gelege bie Partei. 't Dreug dezelfde naam es de baek.
Ziebaeke, die in de Selzerbaek oetmónde zin: de Orsbacher Pütz; de Zieversbaek (of Zieversbach) in de buurt van Holset; de Hermansbaek (Hermansbach), die bie Lemiers in de Selzerbaek sjtruimp en de Harleserbaek (Harleserbach) bie Harles.