Zieversbaek

Van Wikipedia
Naar navigatie springen Naar zoeken springen
Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Völzer, as te dit dialek sjpriks.

De Zieversbaek biej de Sjuurmeule

De Zieversbaek, ouch waal Zieversbach geneump, is ein baek in Nederlandjs Zuud-Limburg en is ein ziejbaek van de Selzerbaek die op häör beurt weer ein ziejbaek is van de Gäöl.
De baek óntsjprink biej Wolfhaag en kump ten noord-weste van Vaols biej Lemiers in de Selzerbaek oet. 't Eësjte gedeilte van de baek is euverkloes. De baek wirt gevoed door allerlei klein brónne en ziejbaeke, wovan de Meulebrokerbaek, de Winnebrokerbaek en de Wijerhaofbaek de belangriekste zint. De baek ligk in 't landjsjap in eine kómp dae ómsjlaote wirt door Holset, de Vielenerbosje en de Vaolserberg en meandert vriejoet door heuvelechtig weijegebeed en haet zoa ein natuurlik prefiel.

De totale lengde van de baek is 3 km, de gemiddelde breide 1,5-2,5 maeter en de deepde 0,1 pes 0,15 maeter. De sjtoumingssjnelheid ligk tösje 0,4 pes 0,8 m/sec.

De watermeules[bewirk | brón bewèrke]

Op de Zieversbaek ligke drie watermeules, sjtroumaafwaerts gezeen zint dat:

  • De Vaolsbrokermeule biej kesjteël Vaolsbrook, die gevoed wirt door water oet eine vergaarviever dae gevoed wirt door de brónne van de Vaalsbokermeulebaek en de Meulebrokerbaek die apaart op de viever oetkómme en daonao samesjtruime en aansjlete op de Zieversbaek.
  • De Frankenhaofmeule in 't buurtsjap Weijerplei, ouch waal Weijershaofmeule geneump, gelaege tösje Holset en Vaols. Dees meule, die neet meë in gebruuk is, woort gevoed oet tweë sjtuwvieversj wovan de watersjtand geregeld woort door ein sjluuske in de Zieversbaek.
  • De Sjuurmeule aan de Oude Akerwaeg.
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Zieversbaek&oldid=382247"