Russisch hierevoetbalèlftal

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Trainer Guus Hiddink en staarspeuler Sergej Semak mèt president Dimitri Medvedev in 2008, nao 't behole vaan de haaf finaal op 't EK in Oosteriek en Zwitserland.

't Russisch hierevoetbalèlftal, bijgenaomp 'De Bere' (Медведи) of '’t Roed leger' (Красная армия) vertrejt Rusland in internationaol voetbalwèdstrije. Officieel besteit 't team pas sinds 1992, wie 't nao 't oetereinvalle vaan de Sovjet-Unie nui gevörmp woort. 't Russisch team en ziene Sovjet-Russische veurgenger höbbe door de jaore heer wisselend gepresteerd. Ze kóste ziech dèks mèt de groete voetbal-len mete, meh bij de wereldtop heet 't team noets ech gehoort. 't Russisch voetbal weurt gereguleerd door de nationaole voetbalboond RFS (Российский Футбольный Союз). Zien toesmatches späölt 't team in d'n Otrkrytnije-Arena, 't Loezjniki-stadion, 't Lokomotiv-stadion (alle drei in Moskou) of 't Petrovskistadion (Sint-Petersbörg). In december 2016 stoont 't team op de 56e plaots vaan de FIFA-Wreldraanklies.

Historie[bewirk | brón bewèrke]

In 1910 woort in 't keizerlek Rusland veur 't iers e nationaol èlftal opgeriech. Dit èlftal had neet väöl succes: 't won allein oonofficieel matches tege de Boheme en waor op de Olympische Speule vaan 1912 totaol neet opgewasse tege de groete len (e 16-0 verlees tege Duitsland waor 't deepdepunt). Mèt 't oetbreke vaan d'n Ierste Wereldoorlog woort 't team oontboonde.

Nao de Revolutie doort 't tot 1923 ietot weer e nationaol èlftal kós weure geformeerd. D'n iersten officiële match waor in 1924, tege Turkije, en woort mèt 3-0 gewonne. Sindsdeen späölde dit team evels aamper wèdstrije, oonder mie umtot de Olympische Speule en de Wereldkampioensjappe woorte geboycot. In 1958 sjreef 't land ziech veur 't iers veur 't WK en späölde verdeenstelek. Bij 't EK vaan 1960, 't ierste oets, woort 't land zelfs de winner. Ouch 't WK vaan 1966, boe 't land veerde woort, waor e succes. Nao 1970 evels góng 't minder; tot 1982 zouw 't land ziech neet veur de groete toernoje plaotse. In de jaore 1980 góng 't get beter, meh de twiede plaots op 't EK vaan 1988 waor 'nen oetsjeter nao bove. 't Lèste optrejje op 'n indtoernooj waor 't (oonsuccesvol) WK vaan 1990. Bij 't formeel opluffe vaan de Sovjet-Unie in 1991 waor de kwalificatie veur 't EK vaan 1992 al begós. Es Gemeinebès vaan Oonaofhenkeleke Staote (GOS) moch dit team doorgoon; 't haolde de indrunde meh had gei succes.

Nao 't EK woort e Russisch team geformeerd. Dit team had de jaore dao-op wisselend succes. 't WK vaan 1994 en 't EK vaan 1996 woorte gehaold, in 1998 en 2000 mós 't team toesblieve. Tijelek succes had 't èlftal nog wel in 2008, wie oonder de Nederlandsen trainer Guus Hiddink de haaf finales woorte gehaold. Bezunder teleurstèllend waor 't optrejje op 't EK vaan 2016, boe ouch Russische voetbalhooligans 't imago vaan land sjaoj aondege. In 2018 organiseerde Rusland 't WK voetbal zelf. De verwachtinge waore vaan teväöre extreem lieg, meh oetindelek haolde 't team de kwartfinaal, oonder mie door Spaanje oet te sjakele.