Spaons hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Spaons hierevoetbalèlftal (bijgeneump La (Furia) Roja, 'De roej (furie)') huurt tot de bèste voetbalploge vaan de wereld, meh neet pas vrij recint dees veuraonstoonde positie bereik. Clubvoetbal waor in Spaanje langen tied belaankrieker es interlandvoetbal. Deils kaom dit door de intern verdeildheid die land teikent, mèt väöl regionaol chauvinisme en wantrouwe tege de centroal regering. 't Èlftal weurt gereguleerd door de Keuninkleke Spaonse Voetbalboond (RFEF). Spaanje steit momenteel (juni 2006) op de zèsde plaots vaan de FIFA-Wereldraanklies; ze höbbe ouch ierste gestande, vaan oktober 2011 tot juli 2014 zelf oonaofgebroke.

Historie

De RFEF woort in 1909 opgeriech, meh e nationaol èlftal woort pas in 1920 opgestèld. Bij zie debuut wis 't direk te winne, en wel vaan Denemarke. In 1934 dege ze veur 't iers aon e wereldkampioensjap mèt; ze wiste dao vaan Brazilië te winne meh verlore vaan gashier en oetindeleke kampioen Italië. De dao-opvolgende Spaonse börgeroorlog maakde e veurluipeg ind aon alle Spaonse competities, zoetot 't niveau daolde. Wel pakde ze op 't WK vaan 1950 nog de veerde plaots.

Heinao braok evels 'ne langen tied aon boe-in 't Spaons èlftal ummer weer oondermaots presteerde, ziech soms gaaroet neet veur 't WK plaotsde en dèks neet wijer es de poulefaas kaom, dewijl de clubs vaan 't land in Europees verband zier succesvol waore. Ouch wie 't team in 1982 in eige land 't WK heel, wis 't dao neet wied te koume. Wel wiste ze in 1964 't Europees kampioensjap, ouch in eige land te winne (dit waor toen nog mer e klei toernooj mèt veer deilnummers, boe de mieste len ziech neet veur insjreve). In de jaore tachteg en negeteg haolde Spaanje dèks wel de kwartfinales vaan 't WK.

De groeten ummekier kaom in de jaore nul. In dat decennium oontwikkelde veural FC Barcelona 'n oongekind hoeg niveau, mèt attractief, sterk op balbezit en op d'n aonval geriech voetbal, bekind es 't tiki-takavoetbal. 't Lökde de trainers Luis Aragonés en Vicente del Bosque dit speul ouch in 't nationaol èlftal touw te passe. Ouch lökden 't noe Castiliaone, Catalaone en Baske in ein èlftal good te doen samewèrke. Spaanje pakde achterein 't EK vaan 2008, 't WK vaan 2010 en 't EK vaan 2012. De prestaties op 't volgend WK en EK waore evels oondermaots. Nao 't ouch al tegevallend WK vaan 2018 spraok de peers vaan 't 'ind vaan e tiedperk'. Ouch op 't EK vaan 2021 en 't WK vaan 2022 woort 't team iejer es verwach oetgesjakeld. In zoewel 2018 es 2021 en 2022 góng Spaanje in de knock-outfase nao penanties droet.