Richard Nixon

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Richard Nixon.

Richard Milhous (Dick) Nixon (Yorba Linda, 9 jannewarie 1913 - Nuuj-York, 22 april 1994) waas 'nen Amerikaanse politieker vanne Republikeinse Partie. Hae waas de zevenendertigste prizzendentj vanne Vereinigdje Staote, van 1969 toet 1974.

Veur zienen tied es prizzendentj deendje Nixon es Aafgevaerdigdje van Californië van 1947 toet 1950 toe d'r waerdje verkaozen es senator veur Californië. In 1952 waerdje d'r door Dwight D. Eisenhower gekaozen es de running mate veure prizzendentjsverkeziginge van 1952, waat zie ouch wónne. Nixon naam doe aafsjied vanne Senaot veure zèsendertigste prizzendentj te waere. Nao twieë termienen es de viceprizzendentj van Eisenhower stal Nixon zich kandedaot veure Amerikaanse prizzendentjsverkeziginge van 1960. Dao wón d'r de nominaasje veure Republikeine, mer hae verloor de verkeziginge vanne senator veur Massachusetts, John F. Kennedy. Naodet 'm ouch mislökdje goevernäör van Californië te waeren in 1962, tróch Nixon zich trögk oete politiek en noom d'r zien aad beroep es avvekaot trögk op.

In 1968 versjeen d'r oppernuuj op 't politiek tenieël doe d'r de nominaasje vanne Republikeine wón veure Amerikaanse prizzendentjsverkeziginge. Same mit ziene running mate Spiro Agnew versloog t'r de viceprizzendentj Hubert Humphrey vanne Democratische Partie. Nixon wón ouch de Amerikaanse prizzendentjsverkeziginge van 1972, doe d'r George McGovern versloog.

Kinmirkendj veur 't prizzendentjssjap van Nixon is de Viëtnamkrieg en 't greujendj verzèt daotaenge, 't veure van 'n óntspanningspolitiek mitte Sovjet-Unie en 't aangaon van betrèkkinge mit 't Vouksrippebliek Sjina. Ouch woorte tiejes zien prizzendentjssjap 't Environmental Protection Agency enne Drug Enforcement Administration opgerich en veurdje Apollo 11 de ieëste maonlanjing oet.

Nixon trooj op 9 augustus 1974 aaf toe zien peziesje ónhaajbaar waas gewore door 't Watergatesjandaal. Daomit waas t'r d'n ieëste prizzendentj vanne Vereinigdje Staote dae vriewillig aaftrooj. Hae woort opgevolg door zienen twieëdje viceprizzendentj, Gerald Ford.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Richard_Nixon&oldid=441671"