Purmerend

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan de (nieuwe) gemeinte Purmerend in de provincie Noord-Holland.

Purmerend is 'n stad en gemeinte in de Nederlandse provincie Noord-Holland. De (nieuwe) gemeinte had op 1 jannewarie 2022 ongeveer 92.000 inwoeners en ligk op 'n oppervlak vaan 96,63 km², woevaan 2,14 km² water. Purmerend ligk in 't noorde vaan Waterland en is veural groet gewore en forenzestad veur Amsterdam. Binne de gemeinte ligke nog de pläötskes Purmer, Purmerbuurt, Middenbeemster, Noordbeemster, Westbeemster en Zuidoostbeemster.

Stadsfuncties

Purmerend is inmiddels e regionaol centrum es is mèt 'n spoorverbinding verboonde mèt Amsterdam en Hoorn. 't Heet drei staties. De viemerret is sinds iewe vaan groete beteikenis. Wijer is 't veural 'n slaopstad.

Stadsbeeld

In Purmerend euverheers de nuibouw vaan de jaore zesteg en zeveteg. De stad weurt door 't reveerke de Where in twie stökker gedeild. In de stadskern is nog get vaan de historische bebouwing te zien; neet al te väöl evels. De umgeving tuint väöl typisch Noord-Hollands weilandsjap.

Historie

Purmerend oontsteit roond 1400 es vlöchtende inwoeners vaan 't dörp Purmer hoegere groond zeuke, dee neet zoe gaw door 't Purmermeer euverstruimp zouw weure. In 1410 maag de stiechter vaan Purmerend, Willem Eggert, hei vaan Wöllem VI van Holland e kestielke bouwe. Dit sloot Purmersteijn woort in 1741 aofgebroke. In de volgende iewe oontwikkelde Purmerend ziech tot e regionaol merretcentrum, dewijl ouch de waterdreiging vaan 't Purmermeer door druuglègking vaan de Purmer en de Beemster teneet gedoon woort. De plaots bleef evels e plattelandsstedsje, tot ze in de jaore zesteg es greujkern woort aongeweze: in korten tied greujde ze vaan 10.000 nao 75.000 inwoeners. Op 1 jannewarie 2022 woorte de gemeinte Beemster aon Purmerend touwgeveug.

Externe link

• Website vaan de gemeinte