Medemblik

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Medemblik (Westfries: Memelik) is e stedsje en 'n gemeinte in de Nederlandse provincie Noord-Holland, in Wesfriesland, aon 't IJsselmeer. De kerne die noe de gemeinte Medemblik vörme hadde op 1 januari 2010 42.648 inwoeners; in 't stedsje zelf woeme oongeveer 8000 lui. 't Oppervlak bedreug 257,78 km², daovaan 135,94 km² water. De gemeinte umvat de kerne Abbekerk, Andijk, Benningbroek, Hauwert, Lambertschaag, Medemblik, Midwoud, Nibbixwoud, Onderdijk, Oostwoud, Opperdoes, Sijbekarspel, Twisk, Wadway (gedeiltelek), Wervershoof, Wijzend, Wognum, Zwaagdijk en Zwaagdijk-West. 't Gemeintehoes steit neet in Medemblik meh in Midwoud.

Historie

Medemblik kraog in 1289 stadsrechte vaan d'n Hollandse graof Floris V, dee dao 'n dwangbörg, Kestiel Radboud, leet bouwe in de strijd tege de (Wes-)Frieze. In 1517 woort 't stedsje geplunderd door e leger vaan Drentse en Friese kapers. In 1572 koos de stad de kant vaan Wöllem van Oranje en woort daorum twie kier (1572 en 1588) door de Spaanjerds belegerd. Intösse had ziech de stad ouch tot 'n belaankrieke have oontwikkeld; dit bleef ze in d'n tied vaan de Republiek ouch. Mèt d'n aonlègk vaan 't Noordhollands Kanaal in 1824 evels raakde ze die functie groetendeils kwiet. Sins de jaore zesteg vaan de twintegste iew is Medemblik e belangriek centrum vaan watersport. Op 1 januari 2007 woorte de gemeintes Noorder-Koggenland en Wognum aon Medemblik touwgeveug, boemèt de gemeinte hiel sterk in umvaank en aontal inwoeners touwnaom. In 2011 kaome dao ouch de opgeheve gemeintes Andijk en Wervershoof bij.