Penis
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
1. urienblaos, 2. sjaambein, 3. penis, 4. zwellief, 5. eikel, 6. veurhoed, 7. urienbuus, 8. diekken derm, 9. ènjderm, 10. zaodblaos, 11. zaodleier, 12. prostaat, 13. kleer van Cowper, 14. anus, 15. zaodleier, 16. biebal, 17. teelbal, 18. scrotum.
De penis, pie(me)l, jóngenhieër of 't gemaak is 't oetwenjig mannelik geslechsorgaan det bieje zougbieëster wuuert gebroek veure urien oet te sjeie. 't Is verwantj ane vrouwelike clitoris, waat bliek oet embryologisch óngerzeuk.
't Urinere is 'n vitaal funksje vanne penis; hiemit waere aafvalstóffen aafgeveurdj inne waterigen draeger urien. Wen de blaos vol zitj, óntsteit 't geveul det me mót pisse. Dit geveul geit eweg wen me de urien dore urienbuus inne penis duit loze.
Bie 't pare wuuert de stieve penis (fallus of prengel) gebroek veur vaginaal penetraasje. Es de penis neet kan stief waere, wodoor gèn penetraasje meugelik is, is veurtplantjing op netuurlike meneer ónmeugelik. d'n Eikel speeltj 'n wichtige rol bie 't opwèkke van 't orgasme; 't orgasme bringk de ejaculatie op gang, wobie sperma nao boete wuuert gebrach. 't Loze vanne sperma geit dore urienbuus. Veur te verkómme det mitte zaodlozing ouch urien vriekump wuuert de prostaot get grótter kort veure zaodlozing; dit blokkeertj de urienwaeg.
De anatomie vanne penis versjiltj sterk van bieës toet bieës. Zoea haet de miens geine knaok in ziene penis, dewiel väöl anger zougbieëster det waal höbbe ('t baculum). Bieje meiste veugel óntbrik dae gans (de zaodbel zitte dan inne cloaca), amfibiejen höbbe waal twieë hemipenes. Väöl óngewerveldje bieëster höbben 'm ónaafhenkelik van einanger óntwikkeldj.