Meister van Aelse

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

De meister van Aelse ies 'ne toegesjreve naam van 'ne beeldsjniejer oet Aelse in Zuud-Limburg dae laefde rónd 1500. De kunstenaer signeerde noats zien werk. 't Werk weurt toegesjreve nao 't vergelieke van sjtieleuvereinkómste. Ein van de wiènige beeldsjniejers, dae in de 16e ièw waal signeerde waor Jan van Steffeswert.

Noadname veur ein of mièrder beeldsjniejateliers?

Sómmige kunshistorici höbbe noadname bedach es: meister van Aelse; meister van Nerotere; meister van Siersdorf (bie Aoke) en meister van de Beekse calvarie achter 'n atelier in Remung, mèt lede oet de Remungse familie van Ool, die tösje 1520 en 1550 drie generaties kunstenaersj hou.

Werk van häöm of toegesjreve aan häöm

In de Augustinuskèrk in Aelse:'n houte Anna-te-drieëbeeld oet 1525
In Nerotere (gemeinte Mezeik) in de Lambertuskèrk: 'n aantal houte beelde en 'n Marianum.
In de Martinuskèrk van Naer: 'n marianum.
In 't Bonnefantemuseum in Mestreech: 'n beeld van Antonius-abt oet 1520 en 'n beeld van de heilige Rochus oet ca 1520.
In de Margarethakèrk van Ittervoort 'n kruusbeeld oet ca 1500.
In de Martinuskèrk van Venlo: 'n marianum
'n Beeld van Elisabeth van Thüringen in de Petrus-Bandenkèrk van Venroj.
'n Beeld van Birgitta in 't museum Maria-Fugie in Uden