Kathelieke Voukspartie

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


De Kathelieke Voukspartie (Nederlands: Katholieke Volkspartij, Fries: Katolike Folkspartij), dèks aofgekort de KVP genömp, waor 'n Nederlandse polletieke partie die op 22 december 1945 woort opgeriech um de veuroorlogse RKSP (de Roems-Kathelieke Staotspartie) te opvolge en woort in 1980 mèt de CHU en de ARP gefuseerd bis de allewijl christelek-conservatieve CDA. De groete miederheid vaan de kathelieke Nederlanders betaomde ziech bis de leije vaan de partie. Zoe stömde in 't kathelieke Limbörg zoen 80% vaan de lui op de partie. De SP waor daan dèks in twiede favoriet vaan de Limbörgers, veural bij mijnwèrkers en aander neet-Limbörgers in Heële en Gelaen. Door häör poppelariteit maakde de partij ummertouw deil oet vaan 't Kabinèt en lieverde 't ouch dèks de premier. Oonder Carl Romme waor dat meistens de PvdA, oonder Norbert Schmelzer waor dat dèks de VVD. Heidoor weurt 't klaor tot de KVP, zjus wie opvolger CDA, ummertouw tösse links en rechs heet gezete mer wel altied conservatieve weerdes, wie femilie, däög en treditie hoeg in de veendels höbbe staon. Vaanaof 1971 góng 't hel achteroet mèt de KVP, en de CDA lieket dat noets mie te höbbe ingehaold. Dit kaom gedeiltelek door nui partije wie D66 en de Boerepartie, mer veural de oontzuiling vaan Nederland (de percessie vaan mie en mie kommenekasie tösse vaan aajdsheer geïsoleerde gróppe wie kathelieke, protestante, wèrkers, bourgeoisie, etc.) rizzelteerde in e krumpend taboe in Limbörg en Noord-Braobant um op aander partieë wie PvdA en VVD te stömme. Dit rizzeltaot is nog ummertouw ziechbaar in 't laand. Zelfs wie de CDA woort opgeriech, en daomèt ouch protestante en zelfs neet-christene begosde te stömme op de partie, in 1980, is de partie noets mie zoe kortbij gekomme bij 't succes vaan de vreuger kathelieke partieë. Evels bleef CDA ein vaan de groetere partije in Nederland, en is 't dat allewijl same mèt de PvdA en de VVD nog ummertouw. Al gief 't 'n greuiende poppelariteit bij D66 en de PVV.