Johann Adam Schöpf

Van Wikipedia
(Doorverweze van J.A. Schöpf)
Gank nao: navigatie, zeuke

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.


Detail van plafónfresco in rococo oet 1751 in de Gerlachuskèrk in Houtem

Johann Adam Schöpf (Straubing bie Regensburg, 1702 - Egenburg, 1772) waor 'ne Duutsje sjilder. Kunshistorisch vèlt zien werk ónder de Beierse barok of rococo (1720-1770). In Nederlands Limburg ies hae bekènd vanwege 't barokinterieur van de Sint-Gerlachuskèrk in Houtem.

Schöpf woort gebore es zoon van de meubelmeker en beeldsjniejer Jacob Schöpf. Vanaaf 1716 waor hae in opleijing es sjilder. Van 1726 bies 1743 verbleef hae in Praag, woa hae wèrkde es frescosjilder. Schöpf waor 'ne aanhenger van keurvorsj Karl Albrecht van Beiere, en woort daorum, naodat hae gevange waor gezat, truukgesjtuurd nao Beiere. In 1745 woort hae de hoofsjilder van keurvorsj Clemens August.

In 1749 góng Schöpf in Bonn wone. Rónd 1750 besjilderde hae de Heilig-Geist-Kapelle van 't Schloß Augustusburg in Brühl. Ouch decoreerde hae de Sankt-Tiberiuskirche in Münster.

Fresco in de parochiekèrk van Houtem-St. Gerlach

In 1751 besjilderde hae de parochiekèrk van Houtem, de vreuger sjtifkèrk van Chateau St. Gerlach, mèt fresco's op 't plafón en aan de moere, in rococo-sjtiel. Waarsjienlik woort hae hiebie geholpe door 'n ploog van mètwèrkersj, woa-ónder ziene zoon Johann Nepomuk.

Nao 1753 góng hae weer in Beiere wone. Dao wèrkde hae in de Johannes Nepomukkapel in Geisselbullach en de Sankt Michael in Beuern. Zien lètste jaore woonde Schöpf op e landgood ten noorde van München. Hae sjtorf op 70-jaorige laeftied in Egenburg.

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Johann_Adam_Schöpf&oldid=349390"