Hoes Nirve

Van Wikipedia
Naar navigatie springen Naar zoeken springen
Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Nuts, as te dit dialek sjpriks.

Hoes Nirve in Nirve bie Nut

Hoes Nirve (Nederlands: Huize Nierhoven) ies 'n landhoes in de buurtsjap Nirve van Nut in de gemeinte Baekdale in Zuud Limburg. De historie geit truuk tot ca 1550. In 't biebehuèrende lièger gelege park aan de euverkant van de weeg, liegke groate vösjvieversj. Door diet dal sjtruimp de Pletsjbaek.

Boew[bewirk | brón bewèrke]

Hoes Nirve besjteit oet 'ne baksjteine, gesjlote hièrehaof mèt binneplei, dae te bereike ies via 'ne poortgevel mèt Philibert-koepeldaak. Op 't woonhoes, mèt tösjedörpelvènstere, hingk in ankersj 't jaortal 1679. Binne zint 18e ièwse betummeringe en sjouwe. Nevebie sjteit 'n sjuur in sjpeklaoge. Bie 't complex huèrt ouch 'n kapel mèt altaor oet de 18e ièw. In de jaore 70 van de 20e ièw vingk restauratie plaats.

Beweunersj[bewirk | brón bewèrke]

Miedde 16e ièw ies de familie Huntjens eigenaer van 't good. Zie verandert häöre naam in 't Latiense Canisius. Ein aantal Limburgse pesjtuèrsj sjtamt oet dees familie. In de 17e ièw lièt de familie ein en ander renovere, woavan de jaorankersj 1679 getuge zin. In 1731 trouwt Elisabeth Canisius mèt Jan Willem van der Meer oet Tóngere. De erfgename van zoon Mathias Philippus van der Meer verkoupe 't landhoes aan de preester Frans Nicolaas Augustinus de Limpens. Naef Leonard de Limpens erf 't landgood in 1811. De volgende in riej ies wir 'ne naef: Karel de Limpens, kantonrechter in Heële en Twiède Kamerlid. Aan 't ing van de 19e ièw ies dees familie oetgesjtorve. August Naest oet Westerloo weurt dan de nuje eigenaer. In 1917 weurt 't complex, mèt 34 hectare, publiek verkoch. Allewiel ies 't 'n appetièk en woonhoes.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Hoes_Nirve&oldid=431294"