De Haan

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan De Haan in Wes-Vlaandere.

De Haan mèt deilgemeintes en aongrenzende (deil)gemeintes (zuug de hoofteks veur 'n verklaoring).

Veurnaom verkantiehoezer in De Haan.

De Haan (Wes-Vlaams: D'n 'Oane; Frans: Le Coq) is e dörp en 'n gemeinte in de Belzje provincie Wes-Vlaandere, arrondissemint Oostende, aon de Noordzie. De gemeinte besleit 42,17 km² en had op 1 januari 2008 12.243 inwoeners.

Geografie

Deilgemeintes

De intern verdeiling vaan de gemeinte De Haan is complex. 't Dörp De Haan is wel de hoofplaots, meh vörmp gein eige deilgemeinte en ligk op de groond vaan twie vaan zien drei deilgemeintes. De hoofplaotse vaan de deilgemeintes zien evels väöl kleinder. Dit heet te make mèt de oontstoonshistorie vaan De Haan (zuug oonder). 't Klemskerks deil had in 2007 3.867 inwoeners, 't Vlissegems deil 1.352.

• I. Klemskerke
  • IV. De Haan-Centrum (westelek deil)
  • V. Vosseslag
• II. Vlissegem
  • IV. De Haan-Centrum (oostelek deil)
• III. Wenduine
  • VI. Harendijke

Aongrenzende (deil)gemeintes

a. Blankenberge (stad Blankenberge) b. Uitkerke (stad Blankenberge) c. Nieuwmunster (gemeinte Zuienkerke) d. Houtave (gemeinte Zuienkerke)

e. Stalhille (gemeinte Jabbeke) f. Ettelgem (stad Oudenburg) g. Oudenburg (stad Oudenburg) h. Bredene (gemeinte Bredene)

Economie

De Haan, Vosseslag en Wenduine zien par excellance toeristische (bad)plaotse. Oersprunkelek - in de negentienden iew - waor ze veural op de rieke lui geriech, later kaom dao ouch väöl 'sociaol' toerisme op (zoe vint me in de gemeinte e Center Parks). Nog ummertouw riech de toeristische sector ziech op lui die hun verkantie aon zie wèlle doorbringe, neet op deegskeslui die nao 't strand goon. Klemskerke en Vlissegem evels zien nog typische polderdörpkes mèt 'n agrarisch karakter.

Historie

Vlissegem weurt veur 't iers geneump in 988, Klemskerke in 1003. De Haan oontstoont väöl later en waor iewelaank 'n oonaonzeenlek vèssersgehuch aon zie. Wie in 1886 de stoumtram bij De Haan kaom, begós dao evels interesse veur 't massatoerisme te greuje. Twie jaor nao d'n tram eupende me 't badhotel. In 1889 verkoch de Belzje staot 'n concessie vaan 50 hectaar duine um te bebouwe. Roond 1900 waor De Haan veranderd in e dörp vaan verkantiewoeninge. Neet allein Belzje, meh zeker ouch Ingelse en Franse toeriste kaome op 't zomerdörp aof, boe oonder aandere e casino (intösse aofgebroke) en de ierste golfbaon vaan Belsj versjene. De snelle greuj brach de hawwers vaan de concessie dèks in conflik mèt de twie gemeintebesture; de oondernummers stèlde ziech bekans op esof ze zelf börgemeister waore. Nog väöl sterker greujde 't dörp vaanaof de jaore zesteg, wie 't ouch betaolbaar woort veur lui oet de arbeiders- en börgerklasse. In 1977 woorte Klemskerke, Vlissegem en Wenduine samegeveug tot de nui gemeinte De Haan, boevaan 't dörp De Haan noe de hoofplaots woort.

Extern links

• Website vaan de gemeinte