Menen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Menen mèt deilgemeintes en aongrenzende (deil)gemeintes (zuug de hoofteks veur 'n verklaoring)

Menen (Wes-Vlaoms: Meên'n, Meênde; Frans: Menin) is 'n stad in de Belzje provincie Wes-Vlaondere, arrondissemint Kortrijk, aon de grens mèt Wallonië en Fraankriek. De gemeinte heet 'n oppervlak vaan 33,07 km² en had op 1 januari 2016 32.877 inwoeners.

Geografie

Deilgemeintes

Menen heet drei deilgemeintes. Binne Menen en Rekkem ligke daobij ouch nog aander kerne. De deilgemeinte Menen zelf mit 16,49 km² en had in 2006 19.246 inwoeners.

I. Menen
- V. De Barakken
- VI. Ons Dorp
II. Lauwe
III. Rekkem
- IV. Paradijs

Aongrenzende (deil)gemeintes

a. Moorsele (gemeinte Wevelgem)
b. Wevelgem (gemeinte Wevelgem)
c. Marke (stad Kortrijk)
d. Aalbeke (stad Kortrijk)
e. Moeskroen (Mouscron, Wallonië)

f. Neuville-en-Ferrain (Fraankriek)
g. Halewijn (Halluin, Fraankriek)
h. Wervik (stad Wervik)
i. Geluwe (stad Wervik)

Ligking

Menen weurt in twieë gedeild door de Leie.

Bezeensweerdeghede

Centraal in Menen steit 't classicistisch raodhoes (1782) mèt renaissance belfort (1610; allebei foto). De bei kèrke, de Vedastuskèrk en de Franciscuskèrk, zien oonuigelek en dèks verbojd, allewel tot in de lèste e sjoen altaar te zien is. Vaan de laat-zeventiendeniewse vesting zien nog versjèllende kazematte en stökker walmoer euver. Bekind is ouch 't Frans militair hospitaol (ouch ind zeventienden iew). Boete Menen steit 'n good oonderhawwe en maolveerdege meule en ligk 'nen Duitse militaire kèrkhof.

Historie

De stad oontstoont aon de Leie, aon de weeg vaan Brugge nao Lille (Rijsel). De ajdste vermelding stamp oet 1087. In de zestienden iew naom 't belaank vaan de stad touw. Ze waor toen bekind um häör beer. Door zien ligking in 't grensgebeed vaan de Spaonse, later Oosteriekse Nederlen en Fraankriek waor 't stedsje in de vreugmodernen tied dèks in oorlog; tösse 1579 en 1830 woort Menen 22 kier belegerd. In 1977 woort de gemeinte oetgebreid mèt Lauwe en Rekkem.