Behaordje bótterbloom
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De behaordje of Sardische bótterbloom of hanevoot (Ranunculus sardous) is 'n bótterbloom oete ranonkelfemielje (Ranunculaceae). De plantj haet väöl eweg vanne knólbótterbloom, meh ze haet geine knól. Ze is hieël zeldjzaam, al kump ze get mieë veur in Zuud-Limbörg. De behaordje bótterbloom haet 'ne veurkäör veur zónnige, zoeaget aope plaatse op vöchtige toet vrie naete, aetesrieke, döks vrie kalkerm, toegeslage grunj; wiejer kump ze veur op braakgrunj. Zoea kan me de plantj vinjen in aope graaslandj (meistes dus de nate, brake weilenj), langs dieke, wintjergraanakkers op leim of löss, waegkantje en akkervaarte.
De behaordje bótterbloom is 'n einjäörige plantj die 15 toet 50 cm hoeag wuuertj. Ze bleutj van mei toet en mit september. De stengele zeen aafstäöndj-behaordj. De leechgreune stengelvoot is koum verdiek (dus geine knól). De plantje vörmen op baoven aan breier-waerendje sjeut. De leechgreun blajer zeen toete voot in drie deiler, döks glanzendj mit leechter vlekke. De leechgael blome zeen 1,2 toet 2,5 cm groeat. De kelchblajer zeen trögkgeslage; de bleujbaom is behaordj enne bloomsstele zeen gegreuf. De vröchte höbbe langs de randj döks 'n riej aan knubkes en meistes 'ne korte, bao rechte snavel.