Baklava

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.


Törkse baklava

Baklava (Arabisch: بقلاوة, baqlāwa; Armeens: փախլավա, pʼaḫlawa; Koerdisch: به‌قلا‌وه‌, beqlawe; Albanees: Bakllava; Azerbeidzjaans: Paxlava; Bulgaars: Баклава, Baklawa; Greeks: Μπακλαβάς, baklav'as; Perzisch: باقلوا, bāqlavā; Roessisch: Пахлава, pachlawa; Törks: Baklava) is lekkesj dat mieëtstes es dessert weëd gegeëte. 't Kunt oet 't Midde Oeëste meh 't behuurt óch tot de Balkancuisines. Dat kunt durchdat 't Ottomaans Riek dat gebeed vunnefhóngerd joare lang uëverhieësj houw. I Wes-Europa weëd 't geserveerd i Törkse en Greekse restaurants. D'r oeërsjprung van 't lekkesj weëd durch versjillende leng en völker geclaimd. Ee va de theorieë zag dat de Assyriërs 't dessert i de achste ieëw vuur Christus houwe oetgevónge. 't Aodste recep sjtamt oet de sjpieër aodheed en kunt oet Grekelank.

Baklava weëd versjillend gemak, meh besjteet ummer oet löagsjkes filodeeg, dat e bietsjke óp bladerdeeg liek. Doatussje guëf 't ummer e noeëtvölling, mieëtstes oet walnoeët, amandel of pistache. Vöal völlinge besjtoa óch oet kanieël, gróffelsnaal, kardamom, sitroeënrief, appelsienrief, roeëzewater en vanillesoeker. 't Baksel weëd noa 't bakke durchdrenk mit zeute siroeëp die besjteet oet hoeënig of soeker.

't Weëd dök i klinge sjtökker gesjneie. Baklava is hieël zeut en mechtig. I vöal leng drink me doarum sjtarke kaffee d'r bei. I toeristische gebede eët me dök e bölke ies d'r bei.

Variaties[bewirk | brón bewèrke]

I g'n regio rónkum g'n Egeïsche Zieë i Törkieje weëd baklava dök gemaak mit pistache, walnoeët en amandel. I g'n Sjwatte Zieëregio weëd 't gevöld mit hazelnuët en de sjtad Gaziantep in 't zuudoeëste van 't lank sjteet bekank um zing pistachebaklava. I Törkieje is 't dök e gebroek um baklava te nöttige mit kajmak, e soat roeëmig zuvelproduk.

I Grekelank besjteet 't lekkesj traditioneel oet 33 löagsjkes, verwiezend noa d'r leëftied va Jezus. De Azerbeidzjaanse baklava weëd gemaak mit walnuët en amandele, dewiel de Armeense dökker mit gróffelsnaal en kanieël gemaak weëd. I Libanon, Syrië, Irak, Jordanië en Israël weëd baklava gemaak mit bótter, walnuët en soekersiroeëp.

Commons
In de categorie Baklava van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Baklava&oldid=413978"