Els Diederen

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Els Diederen declameert bie de presentatie van Sjakelt de zinne in 2006

Els Diederen (Sint-Pièter, Valkeberg, 19 november 1946) ies 'n diechteres en sjriefster, die sjrief in 't Valkebergs. In 't dageliks leve geuf zie ó.m. lès op 'n basissjoal. Diederen volgde ouch de ónderwiesopleidinge teikene, handvaardigheid en textiel wèrkvörme.
Docent Limburgs en ambassadeur van de Limburgse dialekte woort zie nao ’t behole van ’t diploma van de (ièrsjte) pos-hbo-kadercursus Lièrgank Limburgs in 2004.
Zie ies secretarés en websitemeker van de Veldekekrink Valkeberg.
Jan en Bert Diederen zint breursj van häör.

Publicaties

In ’t begin diechde ze in ’t Nederlands; vanaaf 1980 in 't Valkebergs. Häör gediechte en artikele versjene in 't Veldeke-orgaan van Veldeke-Limburg en in diverse ander regionaal tiedsjriefte. Zie maakde ouch 'n aantal vertalinge, woa-ónder 't Valkebergs van twiè personages in 't sjtripverhaol van Suske en Wiske De waerwouf van Ieëtselder; volkskaersjleedsjes veur de kaersjvieringe van de Veldekekrink Valkeberg en tekste/dialekbewèrkinge veur leedsjes van zangvereiniging Orphée, woavan zie zingend lid ies. Ein van die bewèrkinge waor de dialekvertaling van 't Limburgs volksleed in 1996.
Vanaaf 2005 sjrief ze sjtökskes plat, 'n Veldeke-Valkebergrubriek in 't regionaal weekblaad Heuvelland Actueel.

• 1980: Blomekinger: bundel dialekversjkes veur kinger en kingermusical Blomekinger;
• 1984: 't Valkebergs Leesplenkske; in 2000 ouch es virtueel leesplenkske op de website: [1] .
• 1992: gediechte in de bloomlezing Rierank van Veldeke-Valkeberg
• 1992, 1993, 1994: gediechte in de bloomlezinge 1, 2 en 5 van reeks Veldeke Literair van Veldeke-Limburg.
• 1994: Dialekflora (Lies van volksname van plante, blome, sjtruuk en buim), versjene in 't tiedsjrief van Veldeke en op de eige website.
• 1998: Sjpele mèt weurd en klanke, dialeklèsse veur kinger van groep 7/8 van de basissjoale in Valkeberg aan de Geul.
• 2006: Sjakelt de zinne, gediechtebundel in 't Valkebergs mèt eige illustraties, nr 52 in de LiLiLi-serie.

Sjtäölke

Mozart
aart
Mozart
nao de veugel
't keuninkske van boetemaot en euverwiech
of link 'r nao de vink
mèt tegetoanig ing
boewt hae de fien tuèntsjes van de blauwmeis oet
of miè de luiper van de ander
akkoord
muziek greujt
ouch oet de vleugel
en de aansjlaag op zien brein
same breujt
't trio
van interval tot groate terts
zien composities biejein

oet: Sjakelt de zinne (2006)

Externe link

• Website van Els Diederen, mèt o.m. gediechte en beeldend werk