Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
't Limburgs Vastelaovesleedjes Konkoer (LVK) ies 'n jaorlikse wedsjtried in Nederlands Limburg woabie 't bèste vastelaovesleedsje van dat jaor weurt gekoze. 't LVK weurt georganiseerd door de Stichting LVK in samewèrking mèt 'n plaatselike vastelaovesvereiniging en besjteit saer 1977. De presentator en 't geziech van 't LVK were bepaald door L1, Omroep Limburg.
In 1957 waor al ins 'n Limburgs carnavalsleedsje gekoze. 'n Belangriek criterium waor doe dat 't leed vertaalbaar moos zin in alle dialekte.
't Limburgs Vastelaovesleedjes Konkoer woort in 1976 bedach um d'n invlood van de "commerciële" Nederlandstalige carnavalsmuziek te vermindere. Door 'n leedsjeswedsjtried mèt Limburgstalige nummersj wol me de vastelaovesmuziek in dees taal sjtimulere. Ein van de initiatiefnummersj waor Bertha Paulissen-Willen, die ónder andere wèthouwer en gemeinteraodslid in Gelaen waor. Nao häör ies de pries geneump dae de componis en teksdiechter van 't winnend leedsje kriege, de Bertha Paulissen Baeker. De ièrsjte LVK-finale woort gehouwte op 18 november 1976 in Gelaen en woort gewónne door 't Mestreechs leedsje Vaan Eijsde tot de Mokerhei, gesjreve door Bert Salden en Jean Innemee.
't Ièrsjte LVK kreeg nog neet väöl aandach in de gezètter of op de ROZ (de veurluiper van Omroep Limburg en L1). Later ies me de samewèrking mèt dezen umroop aangegange en woorte de versjillende rundes van 't LVK op de radio oetgezónde. Saer 2002 ies de finale van 't LVK live op televisie te zeen.
De leedsjes veur 't LVK moete meistal eind november ingesjtuurd zin. In december beoordeilt de hoofjury van 't LVK alle inzendinge en lièt 60 nummersj doorgoon nao de hauf finales. De hauf finales were op L1-radio oetgezónde in januari. De loesteraersj van L1 kènne door 't insjture van bónne die in de gezèt sjtoont aangeve welke leedsjes zie 't bèste vinge. De oetsjlaag van de bónne-beoordeiling en de punte van de hoofjury bepale allebei veur de hèlf de oetsjlaag van de hauf finales. D'r were dan 19 finaliste bepaald, mèt de beperking dat oet eder van de regio's die 't LVK hanteert (Noord-Limburg, Miedde-Limburg, Parksjtad, Westelike Miensjtreek en Mestreech-Mergelland) minimaal 2 nummersj in de finale kómme en dat oetveurende mer mèt 1 leedsje in de finale kènne kómme.
In de finale weurt d'n oetsjlaag bepaald door (eder veur 1/7 deil) de hoofjury, vief regio-(café)jury's en SMS-sjtumme van kiekersj en loesteraersj (dat lètste saer 2006).
