Zate hermenie

Van Wikipedia

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


'n Träötende zate hermenie in Mestreech

'n Zate hermenie (Nederlands: dweilorkest) neume ze in 't zuje ouch sjpaskapel. In Noord-Limburg neume ze 't ein joekskapel. Normaal treut 'n zate hermenie, die in principe dezelfde instrumente gebruuk es 'n gewoon hermenie en 'n fanfare, allein op mèt vastelaovend, meh ouch waal dao boete es d'r get te viere (zoepe) vèlt.
'n Hermenie ies normaal 'ne groep muziekmakersj, die sjpeelt op zoawaal kopere es houte blaosinstrumente gecombineerd mèt drumwerk. 'ne Groep muzikante, besjtoande oet allein koperwerk, saxofoons en sjlaagwerk weurt fanfaar geneump.

Historie[bewirk | brón bewèrke]

In Mestreech leep rónd de Carnaval, saer 1959, 'ne groep sjpelersj, die ziech de Zaate Herremenie (ierste naom waor Zaat Hermenieke) neumde. 't Versjiensel Zate hermenie, sjpaskapel of joekskapel breide ziech oet in 't lètste kwaart van de 20e ièw. Eder dörp in Nederlands Limburg haet allewiel waal ein of mièrder zate hermenie(kes).

Muziek make[bewirk | brón bewèrke]

De naodrök liek neet op good sjpele, meh op gezellig same muziek make. Dao weurt gebruuk gemaak van 'n groat assortiment sumpel muziekinstrumente mèt de naodrök op 't blaosinstrument en 't ritme-instrument. Ganse families trèkke mèt es de groep nao boete kump, inclusief de kinger. Ze höbbe, sóms eder jaor nuuj, orgineel en kleurrieke pekskes aan.
Op carnavalsdinsdig vingk in Mestreech, op de Vriethof, 't Zate hermeniekesconcour plaats, 'ne wedsjtried woabie gekäörd en gemete weurt door de carnavalssociëteit. Edere deilnummer krieg 111 punte, (dat ies de ièrsjte pries) mèt lof van de jury!.

LKZH[bewirk | brón bewèrke]

Eder jaor sjtrieje 19 zate hermeniekes (joekskapelle, blaoskapelle, etc) oet gans Limburg veur de titel 'Limburgs Kampioen'. Dit LKZH of Limburgs Kampioensjap Zate Hermeniekes ies in 1983 ontsjtange in Obbicht.

Muzieksoort[bewirk | brón bewèrke]

De muziek die ze make kèn vanalles zeen. Vastelaovesmeziek, polka's, sjlagersj, top-50, volksleedsjes etc. Allein mèt 'ne minder serieuze ondertoan. Echte bekènde nummers zeen: Over and Out, Sweet Caroline, Adelita, Träöt op die Träöt, Der Wandersmann, Tipperary, Slavenkoor en diverse Limburgse en Duutsje sjlagers. Dit is waal weer aafhankelik woa de hermenie vanaaf kump. Meistal nog aangevuld mèt regionaal en plaatselike nummersj.
Zate hermeniekes loupe noats in de maot, eigelik miè de tegenin!

Karakteristieke name[bewirk | brón bewèrke]

Um te laote zeen, dat 't muziekmake neet serieus opgevat moet were verzinne de kapelle karakteristieke name zoa-es b.v.: Nieks dao; Hel en valsj, Tuutendöl, Bragke Boebelaere, ‘’t Kump’, Naat en Druug, Um te jenke; Laat en Zaat; Volle blaos; Kiele kiele; de Kroegadours; Sjeive drek; Gresbuus; Doebele Forto; Blamaasj; Us Famfaar (1973), Aom zat en Geine aom; Biëstig good (1986), Flabbedeius, Sjots en Sjeif (1977); Neet um aan te huure NUATH (1976); Petatte Nelke, Hoëge Noë(d)t (1976); Sjiengele boem (1976); Schöd 'm laeg (1994); 't Kump waal (1992); Oete Waeg (1975), Batjakkers (1979), Hou op die Kis (1979): Joekskapel Ôngehoebeldj (1991):

Externe link[bewirk | brón bewèrke]

Commons
Commons
In de categorie Dweilorkest van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Zate_hermenie&oldid=462995"