Woerden

Van Wikipedia
Gank nao: navigatie, zeuke

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.


Gemeinte Woerden

Veendel vaan Woerden

Waope vaan Woerden

Gemeinte Woerden in de provincie Utrei

Provincie Utrei
Hoofplaats Woerden
Börgemeister (lies) Hans Schmidt (VVD)
Opperflaakde
– daovan water
92,89 km²
3,39 km²
Inwoeners
deechde:
49.869 (1-4-2011)
557/km²

Woerden is 'n stad en gemeinte in de Nederlandse provincie Utrei, mèt 'n oppervlak vaan 92,89 km2 (daovaan 3,54 km2 water) en 'n inwoeneraontal vaan 47.872 op 1 januari 2006. Neve de stad Woerden besleit de gemeinte de dörper Harmelen, Kamerik, Kanis (neet es kern erkind meh tot Kamerik gerekend) en Zegveld, 't gehöch De Meije (deils) en de naobersjappe/polderlandsjappe Barwoudswaarder, Gerverscop, 's-Gravesloot, Indijk, Oud-Kamerik, Reijerscop, Rietveld en Teckop.

Stadsfuncties[bewirk | brontekst bewerken]

Woerden, op 'n gooj locatie in 't Greun Hart gelege aon de spoorweeg vaan Utrei nao Rotterdam en D'n Haag, heet 'n besjeie industrie oontwikkeld, mèt twie groete levesmiddelebedrieve, 't Monafebrik (allewijl oonderdeil vaan Campina B.V.) en de smeerkiesindustrie vaan Keuninklike ERU B.V. Wijers is Woerden 'n forenzestad veur Utrei, daankzij de spoorverbinding daoveur hendeg gesjik. Es plaotselek verzörgingscentrum is de middestaand good vertegewäördeg.

Woerden gelt sinds jaore es statistisch de mies gemiddelde gemeinte vaan Nederland. Daorum weure hei wel ins merretgeriechte experiminte gedoon, wie de inveuring vaan 'n chipkaart begin jaore 1990 of 't aofrunde vaan rekeninge in euro's in 2004.

Stadsgeziech[bewirk | brontekst bewerken]

Veurmaoleg raodhoes vaan Woerden, mèt laat-gotischen oonderbouw en renaissancistische bovebouw.

Woerden heet 'n aajd stadscentrum mèt 'n staarvörmege umwalling boevaan de grachte bekaans intak zien gebleve. D'n Awwe Rijn löp vaanajds door Woerden, meh 't deil binne de umwalling is in de jaore zesteg gedemp en hèt noe Rijnstraot. 't Centrum is neet bezunder riek aon aw gebouwe; 't aontal rieksmonuminte bedreug anno 2012 60 (veur de stad Woerden zelf).[1]'t Veurmaoleg stadhoes mèt ziene zestiende-iewse gevel (foto) is 't belaankriekste monumint oet d'n tied vaan veur 1800. De hervörmde Pieterskèrk oet de veertienden iew[2] is veur 'n stad bezunder klein. 't Kestiel Woerden is vieftiende-iews. Belaankrieker zien de negentienden-iewse monuminte in de stad, in 't bezunder de neogotische kathelieke Sint-Bonaventurakèrk vaan Nicolaas Molenaar sr., mèt zienen torie vaan 77 meter, zoewie de kazerne aon 't Kèrkplein.

In de umgeving is 't veural hiel greun; wie gezag ligk de stad in 't Greun Hart. Veural Kamerik, Zegveld en umgeving bestoon oet e waterriek veengebeed; de kleinsjaolege polders oet de middeliewe zien weerdevol cultuurlandsjap. In Harmelen is de groond droeger en 't landsjap aanders. 't Monuminteregister gief 30 riekmonuminte op veur Harmelen,[3] 21 in Kamerik,[4] niks in Zegveld, 2 in Gerverscop,[5] ein in Reijerscop[6] en 6 in Rietveld.[7] Kamerik is es eineg dörp besjermp dörpsgeziech.[8]

Historie[bewirk | brontekst bewerken]

Woerden steit op de plaots vaan 'n aajd Romeins castellum, 't Castellum Laudii, aon d'n Awwe Rijn, deen in deen tied es grens deensdeeg. De naom Woerden kump vaan woerd, de Frankische vörm vaan wierd, wat wèlt zègke 'terp', woenheuvel. Woerden, 'n plaots in de frontlinie tösse Utrei en Holland, woort in de twelfde iew versterk en kraog in 1372 stadsrechte. In de middeliewe en de vreugmodernen tied evels waor 't gein veurnaom stad; ze had beveurbeeld gein zitting in de Staote vaan Holland. In 1572 koos de stad bij d'n Opstand de kant vaan de prins, boenao de Spanjole de stad e jaor laank zoonder succes belegerde. De groete greuj kaom in d'n twintegsten iew, wie de stad es forenzeplaots veur Utrech en es good gelege industriestad belaankrieker woort. In 1989 woorte de gemeintes Kamerik en Zegveld geannexeerd; ouch góng de nui gemeinte toen euver vaan Zuid-Holland nao Utrei (boe de geannexeerde dörper altied al bijhoorte). In 2001 woort ouch de gemeinte Harmelen aon Woerden touwgeveug.

Gebore in Woerden[bewirk | brontekst bewerken]

Rifferenties[bewirk | brontekst bewerken]

  1. Rieksmonuminte in de stad Woerden
  2. Reliwiki - Woerden, Kerkplein 5 - Grote of Petruskerk
  3. Rieksmonuminte in Harmelen
  4. Rieksmonuminte in Kamerik
  5. Rieksmonuminte in Gerverscop
  6. Rieksmonuminte in Reijerscop
  7. Rieksmonuminte in Rietveld
  8. Besjermde stads- en dörpsgeziechter

Externe link[bewirk | brontekst bewerken]

Provincie Utrei

Amersfoort | Baarn | Bunnik | Bunschoten | De Bilt | De Ronde Venen | Eemnes | Houten | IJsselstein | Leusden | Lopik | Montfoort | Nieuwegein | Oudewater | Renswoude | Rhenen | Soest | Stichtse Vecht | Utrei | Utreise Heuvelrögk | Veenendaal | Vianen | Wijk bij Duurstede | Woerden | Woudenberg | Zeist

Opgeheve gemeintes

Aafkomstig van Wikipedia, de Vriej Encyclopedie. "http://li.wikipedia.org/w/index.php?title=Woerden&oldid=339010"