Watermaal-Bosvoorde
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Watermaal-Bosvoorde (Frans: Watermael-Boitsfort) ies 'n gemeinte in 't Brussels Hoofsjtaejelik Gewes, in 't zuje van de agglomeratie Brussel. De gemeinte haet 'n oppervlak van 12,93 km² en 24.047 inweunersj (1 januari 2006). Bies 't begin van de neugetiènde ièw waore Watermaal en Bosvoorde aafzónderlike dörper.
Miè es de hèlf van 't gróndgebeed van Watermaal-Bosvoorde besjteit oet bösj, 't Zoniënwoud. Daodoor ies 't de mins versjtaejelikde gemeinte van 't gewes en haet 't de liègste bevolkingsdiechheid.
Watermaal-Bosvoorde ies veural 'n woongemeinte. De tuinwieke Le Logis en Floréal oet de jaore 20 van de 20e ièw, zint intersant vanwege hun arsjitectuur. 't Keymplein vörmp 't (winkel)centrum van de gemeinte. In 't veurmalig dörp Watermaal liek de Sint-Clemenskèrk, mèt romaanse tore. Bosvoorde haet 'n neogotische kèrk.
