Waterland

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan de gemeinte Waterland in Noord-Holland

Waterland is 'n gemeinte en 'n streek in de Nederlandse provincie Noord-Holland. 't Waterland ligk tösse 't Markermeer (in 't ooste), Amsterdam (in 't zuide), de Zaanstreik (in 't ooste) en Wesfriesland (in 't noorde). De gemeinte Waterland besleit evels neet 't gans gebeed: me rekent ouch Landsmeer, e deil vaan Purmerend, Lendelek Noord-Amsterdam en dèks ouch Edam-Volendam tot 't Waterland. De gemeinte Waterland had op 1 augustus 2006 17.244 inwoeners, besleit 'n oppervlak vaan 115,6 km² (daovaan 53,6 km² water; vandao de naom) en besteit oet 't stedsje Monnickendam, de dörper Broek in Waterland, Ilpendam, Katwoude, Marken (e veurmaolig eiland) en Uitdam.

't Waterland heet ziene naom neet gestole: binne de bedieking die 't gebeed besjermp ligke hiel väöl klein en groeter pole en iewelaank waor 't land erreg vatbaar veur euverstruimingsrampe. Vaanajds sprik me hei de Waterlandse variant vaan 't Hollands, dit dialek is neet euveral eve vitaol mie, umtot ziech in väöl dörper lui vaan boete 't Waterland - veural oet Amsterdam - gevesteg höbbe.

Historie

In de vreug middeliewe waor 't land al bewoend; 't hoort toen bij 't Fries vestegingsgebeed en 't waor 'n gouw vaan Wesfriesland. In de loup vaan de middeliewe góng 't gebeed verlore aon Holland. In de twelfde en daartiende iew begós me 't gebeed mèt 'ne ziediek te umgeve. Dezen diek braok in de volgende iewe dèkser door. De törfgroond waor veur akkerbouw oongesjik; daorum lag me ziech vaanajds op viehawwerij touw. In de veertiende iew oontstoonte de ierste stei, Edam en Monnickendam. In de zeventiende iew woorte de groetste plasse in 't Waterland druuggelag. De modern gemeinte Waterland oontstoont in 1991 door sameveuging vaan de aw gemeintes Broek in Waterland, Ilpendam, Katwoude, Marken en Monnickendam.

Externe link

• Website vaan de gemeinte