Walter Hallstein

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Hallstein in 1957.

Walter Hallstein (Mainz, 17 november 1901 - Stuttgart, 29 mièrt 1982) waor 'nen Duutsjen diplomaat en polletieker. Hallstein waor d'n ièrsjte President van de Europese Kemissie van de Europese Ikkenomische Gemeinsjap, de veurgenger van de Europese Unie, en weurt gezeen es eine van de belangriekste persone in 't proces van Europese integratie. Hae waor es lid van de Duutsje polletieke partie de CDU ouch President names de christendemocratische Europese Voukspartie (EVP), woa ouch 't Nederlands CDA, de Vlaamse CD&V en de Welsje Les Engagés lid van zin.

Hallstein begoes zien academische carrière kort veur d'n Twiède Waereldoorlog. Op 29-jäörige leeftied woort hae professor in 't Duutsj Rech. Hallstein waor op dat momint de jongsten Duutsjer dae de titel oats haw gekrege. Tiejesj d'n oorlog deende hae es legerofficier veur Nazi-Duutsjland in Nazi-bezèt Frankriek. In 1944 woort Hallstein gevangegenomme door Amerikaanse troepe en verbleef hae de res van d'n oorlog in wirkkampe in de Vereinigde Sjtate. nao d'n oorlog ging hae truuk nao Wes-Duutsjland en vervolge hae zien academische carrière bies 1950. In dat jaor woort hae 'n diplomatiek functie toegeweze. Hallstein ging veur 't Duutsj ministerie van Boetelandse Affaires wirke. Tiejesj zie wirk bie 't ministerie woort hae veurnamelekik bekind vanwaege de nao 'm verneumde Hallsteindoctrine, 'ne policy dae veur isolatie van de DDR (kommenistisch Oas-Duutsjland) moos zörge.

Es 'ne groete veursjtander van 'n fidderasie van Europa sjpeelde Hallstein 'ne belangrieke rol in 't proces van Europese integratie. Daoneve maakde hae ziech hel veur de rehabilitatie van Wes-Duutsjland in kapitalistisch Wes-Europa. Zien Europese ambities zörgde dieks veur conflicte mèt d'n Duutsje minister van ikkenomische affaires, Ludwig Erhard. Hallstein waor eine van de architecte van de Europese Gemeinsjap veur Koale en Sjtaal en woort in 1958 d'n ièrsjte President van de Europese Kemissie tiejes de Europese Ikkenomische Gemeinsjap. Hae waor van 7 jannewarie 1958 bies 20 juni 1967 Kemissie-prizzedent. Hallstein vertrok es prizzendet nao e konflik mèt de Franse prizzedent Charles de Gaulle. Daonao woort hae lid van 't Duutsj parlemint. Onger druk van de Franse regering woort zien amb euvergenomme door de Belzje liberaal Jean Rey. Prizzedentsjap van de Europese Kemissie ging toen nog gans via nationaal regerinsleiersj. Pas vanaaf 't Verdraag van Lissabon in 2007 woort dit prizzedentsjap ouch subjek aan 't democratisch direk verkoze Europees Parlemint.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Walter_Hallstein&oldid=455073"