Mariaberg

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Mariaberg

Kaart
Mariaberg in de gemeinte Mestreech.
Basisgegeves
Oppervlekde	umtrint 0,6 km² (60 ha.)
Inwoeners	4.541
Bevolkingsdiechheid	7568 inwoeners/km²
Gemeinte	Gemeinte Mestreech

Mariaberg is 'n wiek ten weste vaan 't stadscentrum vaan de gemeinte Mestreech. Mariaberg weurt begrens door de wiek Biesland in 't zuie mèt de Tongersewegk, Belfort en Daalhof in 't weste mèt de Javastraot, de Brusselsepoort in 't noorde mèt de Borneostraot en Annadal en 't Kommelkerteer in 't ooste mèt den Hertogsingel. De wiek Mariaberg ligk op ein heuvelflank boeop de drei euver het algemein besjouwde deiler, ziech achterein opvölge. Dees drei wiekdeiler zien Blauwdörp, Mariaberg en Trichterveld.

Blauwdörp

Het oostelek deil vaan de wiek weurt ouch wel Blauwdörp geneump. Den oersprunkeleke naom vaan dit deil is Prosdijveld, dit umtot hei vreuger ei veld vaan de prosdij vaan Sint-Servaos laog. Aon de ran vaan dit wiekdeil staot de aajdste beboewing vaan ± 1900. Vaanaaf het centrum gezeen luipe der vaanaaf het Brandeburgerplein twie straotvertakkinge de wiek in. Eine geit nao het noorde nao het Volksplein en de anger geit noa het zuie nao het Minister-Goeman-Borgesiusplansoen. Ein stögk weier doorkruust de Prosdijwegk het wiekdeil in twieë vaan noord nao zuid. Roontelum diese wegk boewde de Römsj-Katholieke woeningboewvereineging Sint-Servatius vaanaof 1917 häör sociaole woeninge, dee het groetste deil vaan Blauwdörp oetmagke.

Roond 1900 waor het mèt viel lui slech gestelt in industriestad Mestreech. Umtrint de helf vaan de Mestreechtenere leefde op of onger d'ermoojgrens. De socialiste (ouchwel de Roeje genump) wouwe get veur de febriksmaan doen. Meh de aristocratie en de geesteleke (ouchwel de Blauwe genump) vaan de stad zaoge ze es ein gevaor. Toch kriege de socialiste door de vakbonde de febrikslui aachter ziech. Meh de febrikkante wèlle neet instumme mèt de winse vaan de febrikslui. De febrikslui raoke noe verdeilt, ein deil stuut ziech aon bij katholieke vereineginge. De (wienege) socialiste in de stad legke ein basis, meh het zien de katholieke dee het meiste te zegke höbbe. Kapelaon J. M. Souren waor d'r zoe eine. Heer wèrkde veur de woeningboewvereineging Sint-Servatius dee in 1907 beginne mèt de ierste arbeidershoeser in Blauwdörp. Het zeen neet de blauw daak dee de naom höbbe gegeve aon de wiek meh de katholieke. De katholieke weure/woorte naomelek geassocieerd mèt de kleur blauw, daorum gaof Kapelaon J. M. Souren de wiek de naom Blauwdörp.

Zjus neve dit 'Blauwdörp' boewe de socialiste ouch get hoeser bij het Minister-Goeman-Borgesiusplansoen in 1918 mèt häör woeningboewvereineging Beter Wonen. Ein moer sjeidde de twie 'kleure' vaan einanger. In 1922 boewde de socialiste in Sint Maartenspoort aon de aangere kaant vaan de Maos. De streit tösse roet en blauw was heveg, zoe es ouch bij de iertse algemeine verkiesinge in 1920. Bij ein staking bij de Zinkwitmaatsjappij 1929 vele der zèlfs twie doede. De nuie bewoeners vaan Blauwdörp móste wel käörege katholieke zien, de touwlaoting waor daan ouch steng. Toch waor der wel sympatie veur de socialiste, zoe behaolde de socialiste in 1920 bijnao eindaarde vaan de stömme in de gemeinte. Ouch ein vaan de belaangriekste socialiste in de stad is geiert gewore, de Gulpeneer W. H. Vliegen. Noa häöm is ein straot in Blauwdörp vernump en steit der ein standbeild vaan häöm op het Brandeburgerplein.

In de Twiede Weltkreeg woort Blauwdörp gebombardiert. 28 lui koume neet levend oonder het puin vaandan. Ei gedeilte vaan de wiek woort in de jaore '70 en '80 gesloop ouch woorte der get hoeser gerenovierd. Toch lieke der hoeser neet mier aon de eis vaan allewijl te voldoen (väöl hoeser höbbe nog inkelglaas veur de roete).

Wiekdeil Mariaberg

Het wiekdeil Mariaberg ligk ingeklemp tösse Blauwdörp en Trichterveld. De Ruttensingel in het ooste en de Florasingle in het weste vörme de begrensing. Ouch dit deil vaan de wiek is weier te verdeile in twie deiler. Het gief ein deil in het ooste; de ziestraote vaan de Ruttensingel, en ein deil in het weste; de straote roontelum het Fatimaplein. Wiekdeil Mariaberg kin me besjouwe es het iegeleke Mariaberg, het kint daan ouch gein angere naom, zoe wie Blauwdörp en Trichterveld höbbe.

Trichterveld

Het westelek deel, dat besteit oet klein witte huiskes mèt roej dake, in de volksmoond de bungalows geneump, weurt ouch wel Trichterveld genump. Het Trichterveldse deil is einigen tied oonderwerp vaan discussie gewees. De bouwvereineging dee eigeneer is vaan de witte huiskes wouw de huiskes aofbreke umtot ze neet mie aon de eise vaan d'n tied voldege. De bewoeners höbbe ziech dao lang, mer mèt eineg succes, tege verzat. De mieste huiskes blieve stoon en zien/weure gerenoveerd, en 'n aontal weurt vervaange door nuibouw in dezelfde stijl.

Externe Links

• Historie vaan Blauwdörp (op het Holles)
• Buurtplatform vaan Mariaberg (op het Holles)
• Wiekportaol (op het Holles en Ingels)