San Marinees hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
.jpg)
't San Marinees hierevoetbalèlftal vertreujt San Marino in internationaol voetbalmatche. 't Team weurt gereguleerd door de nationaol fidderatie FSGC, die sinds 1988 bij de UEFA en de FIFA is aongeslote. Sindsdeen heet 't team extreem wieneg succes gehad en dèks mèt groete ciefers verlore. De prestaties waore door d ejaore heer zelfs nog minder es die vaan aander dwergstaote in Europa; dit maak 't Sanmarinees team eint vaan de slechste nationaol èlftalle op de wereld. Per 24 oktober 2024 steit 't team 210e op de FIFA-Wereldraanklies, ofwel gans oonderaon.[1]
San Marino späölt zien toesmatche in 't San Marino Stadium in Serravalle.
Historie
[bewirk | brón bewèrke]De San Marinese voetbalboond stamp oet 1931, meh pas jaore later woort serjeus werk gemaak vaan e nationaol èlftal. In 1986 woort veur 't iers 'n èlftal opgestèld, wat op 28 miert vaan dat jaor aontrooj tege 't Canadees Olympisch èlftal (0-1 verlees). In 1988 kaom de boond bij de FIFA en de UEFA en kóste de matche vaan 't team ouch officieel weure erkind.
Sindsdeen heet San Marino ziech veur alle groete toernoje ingesjreve. Noets kaom 't team in de buurt vaan kwalificatie, en miestens indegde 't team puntloes oonderaon. Groete teams hole soms hendeg oet tege San Marino: zoe won Duitsland in 2006 mèt 0-13 en zat Nederland in 2011 'nen indstand vaan 11-0 neer. Wienie e groeter team neet of neet gemekelek vaan San Marino wint, kin dat zwoer gevolge höbbe veur de favoriete. Zoe stapde Gary Johnson, coach vaan Letland, in 2001 op naotot zie team mèt 1-1 geliek had gespäöld tege San Marino.
D'n ierste kier tot 't team 'ne match won waor op 28 aprèl 2004, in 'ne vrundsjappeleke match tege Liechtenstein (1-0). Twinteg jaor laank bleef dee stoon es insegste euverwinning vaan San Marino, meh de UEFA Nations League vaan 2024/25 brach dao verandering in. In 'n gróp mèt Liechtenstein en Gibraltar won 't lendsje twie kier vaan Liechtenstein, boe-oonder eine kier oet. Mèt ouch nog e geliekspäöl tege Gibraltar haolde 't team zeve punte en de ierste plaots in gróp 1 vaan de D-devisie. Dees campagne zörgde veur e hemfelke noviteite, boe-oonder d'n ierste competitieve wins, d'n iersten oetwins en d'n ierste kier tot 't land örges es ierste indegde (tot daan touw waor 't ummer es alderlèste geïndeg).[2][3] Door dit succes promoveerde San Marino nao gróp C.
Recordinternational is Matteo Vitaioli, dee sinds 2007 98 kier veur 't land is oetgekoume (per 19 november 2024). Topscoorder is Andy Selva, dee tösse 1998 en 2016 veur San Marino späölde en in 74 matche 8 kier scoorde.