Roer en Euvermaos
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Roer en Euvermaos (Nederlands: Roer en Overmaas) waor e watersjap in de provincie Nederlands Limbörg, dat dao 't zuielek deil vaan besloog. 't Watersjap umvatde 't Heuvelland, de Roerstreek en de Maosbèdding tot aon Zjwame. Hoofplaots waor Mestreech. 't Watersjap woort in twie fases kort opein gevörmp: in 1980 fuseerde de aw watersjappe Gelaen- en Meulebaek en Vloeatbaek tot 't watersjap Gelaen- en Vloeatbaek; in 1983 kaom dao 't Zuveringsjap De Geul bij en woort 't Roer en Euvermaos.
Umvaank en kinmerke
[bewirk | brón bewèrke]'t Watersjap waor 95.000 hectaar groet en woort bewoend door zoe'n 718.000 lui. De organisatie had neet minder es 1225 beke in oonderhajd, die in totaol evels mer 974 kilometer laank zien. Reviere waore oonder mie de Maos, de Roer en de Geul. De totaol lengde vaan de kaoje (revierdieke) waor 83 kilometer. Typisch veur dit watersjap waor 't groet huugdeversjèl (de Hollandse gewuunde um in 't gans hoegheimraodsjap 'tzelfde peil te hawwe is natuurlek neet haolbaor): bij Zjwame stoont de Maos 10,6 bove NAP, op de Völzerberg wel 323 meter.
Waope
[bewirk | brón bewèrke]Roer en Euvermaos had 'tzelfde waope wie 't kortstoondeg watersjap Gelaen- en Vloeatbaek (zuug pleetjse). De besjrieving is zoe: doorsnoje; 't boveste deil gedeild, 't ierste kerteer vaan keel mèt 'nen ope börg mèt veer kantele vaan goud en 'n opgetrokke valdeur vaan sabel, 't twiede kerteer mèt in azuur e meuleraad vaan zèlver, in ederen hook vergezèld vaan eine penning vaan 'tzelfde; in 't oonderste deil in zèlver drei golvende paole vaan azuur, edere belaoje mèt 'ne keper vaan goud, de boeteste twie in 't midde en de middeste op d'n taamp, mèt euver alles heer sjuinsgekruis 'nen hamer en 'ne moker vaan goud.
De börg kump oet 't aajd waope vaan Vloeatbaek. 't Meuleraad is e symbool veur de väöl watermeules die de beke in 't gebeed iewelaank aondreve. De golvende paole stèlle beke veur, de kepers stoon veur stoppe (sluize) dao-in, d'n hamer en moker stoon veur de vreugere mijnbouw in Zuid-Limbörg.[1]
Bronne
[bewirk | brón bewèrke]Dit artikel is deils gebaseerd op 't corresponderend Nederlandstaoleg artikel, en wel in dees versie.