René Imkamp

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.


René Florent Marie Hubert Imkamp (Remunj, 1 juli 1947 - Remunj, 1 november 2019) waar 'ne besjtuurder van vereiniginge op religieus, sociaal en cultureel gebied.

Tiedes ziene sjooltied op 't Biesjoppelik College in Remunj waerde René Imkamp actief in de Remunjse jeugbewaeging Eucharistische Kruutstoch (EK). Dao leerde d'r de promotor van Limburgse volkscultuur Jo Hansen kinne. Same vörmde zie de EK óm toet de Cultureel Sociëteit (CS). Dees is doorgezat es Sjtichting EK/CS. Imkamp zoog in Jo Hansen ziene leermeister.

Nao zien sjtudie econometrie aan de Kattelieke Hogesjool Tilburg vervölde Imkamp functies in 't bedriefslaeve, onder meer biej DSM en Spectrum Oetgaevers, en es finansjeel directeur biej Prinsen BV.

In Remunj en in Limburg kreeg Imkamp bekindjheid door 'n rits van besjtuursfuncties in 't vereinigingslaeve. Zo waar d'r veurzitter van de Remunjse Sjtichting 1880, die sociaal en cultureeel doele financieel óngersjteunt. Ouch waar d'r veurzitter van de Sjtichting Taptoe Remunj en veurzitter van de Sjtichting Vrienden van Huize Blankenberg. Hae waar penningmeister van de Sjtichting Munsterkerk 800 en (sinds 2016) van 't parochiebesjtuur St. Christoffel en H. Geest. Ouch waar d'r penningmeister in 't hoofbesjtuur van 't Keuninklik Limbörgs Gesjied- en Aadheidkundig Genootsjap. Op zien initiatief waerde de Sjtichting Jo Hansenpries veur Volkscultuur opgerich, 'n sjtichting wovan d'r van 1984 toet zie sjterve veurzitter waar.

René "Naad" Imkamp waar ouch 'n bekinde versjiening in de vastelaoveswaereld. Hae begós in 1971 es adjudant van grootvórs Jo Hansen. In 1980 waar d'r prins van vastelaovesvereiniging D'n Uul mit de sjpreuk "Waat meint geer det hiej te doon is?". Jaorelang waar d'r veurzitter en vórs van D'n Uul. Sins 1988 waar d'r besjermheer van K.V. Koelbertus.

Veur al zien maotsjappelike verdeenste waerde Imkamp in 2010 beneump tot ridder in de Orde van Oranje-Nassau. Ouch waar hae ridder in de Orde van 't Heilig Graaf van Jerusalem. René Imkamp waar 'ne broor van aad-wèthajer Lodewijk Imkamp.

René Imkamp ligk begrave op 'De Aje Kirkhaof' in Remunj.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=René_Imkamp&oldid=446491"