Lodewijk Imkamp
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
L.M.M.H. (Lodewijk) Imkamp (Remunj, 5 november 1949) is 'ne Nederlandjse politicus van D66. Hae waar de letste börgemeister van de zelfsjtenjige gemeinte Kessel.
Lodewijk Imkamp volgde de gymnasiumopleiding aan 't Bissjoppelik College ('t Kleesj) in Remunj. Daonao ging hae nao de academie veur beeldende kunste Sint-Joost in Breda. Sins 1980 waar hae in Remunj es grafischen óntwerper wèrkzaam. Daonaeve waar hae heel actief in 't maotsjappelik laeve in dees sjtad. In 1985 brach hae 't book De oorlog in kleur: Hustinx reist durch Nederland 1939-1946 oet, gebaseerd op 'n oetgebreide fotocollectie die hae èrfde van zienen ome, de fotograaf Alphons Hustinx.
Van 1991 tot 2002 waar Imkamp lid van de gemeinteraod van de gemeinte Remunj. Van 1999 tot 2006 waar hae wèthajer in Remunj. In januari 2009 waerde hae beneump tot waornummende börgemeister van de destiedse gemeinte Kessel. Dees gemeinte ging op 1 januari 2010 op in de nuuj gemeinte Pieël en Maas, womit zien opdrach es waornummende börgemeister vervöld waas.
Lodewijk Imkamp is 'ne broor van René Imkamp.