Jo Hansen

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.


Jo Hansen (Remunj, 1921 - Zittert, 26 juni 1984) waar 'ne Limburgse heimkundige, literator, folkloris en dichter.

Hansen sjtudeerde Franse taal- en lètterkunde in Nimwaege en waar leraar aan 't Sint Ursulalyceum in Remunj. Es óngetrouwde manskaerel wiejde d'r ziene vriejen tied aan 't gemeinsjapslaeven in Remunj, de bevordering van de Remunjse en Limburgse cultuur en taal, Rooms-Kattelieke devotie en de dichkuns. Tiedes zie laeve gruide d'r oet toet 'n in zien gebaortesjtad en in Limburg bekinde perseunlikheid die neet aaflaotend zien leefdje veur de Limburgse cultuur en 't Limburgs dialek oetgedrage haet.

Hae waar veurzitter, later moderator, van de Remunjse jeugbewaeging Eucharistische Kruistocht en organiseerde tal van cultureel evenemènte en reize. Hae sjpeelde 'n verbinjende rol in 't Remunjs vastelaoveslaeve es vórs van Remunj. Hae vierde ziene verjäördig neet, meh waal 't naamfees op 't fees van Sint-Jozef, op 19 meert, wobie 't Remunjs vereinigingslaeve massaal dao waar.

Jo Hansen ligk begrave oppe kèrkhaof "Tösse de Berge" in Remunj.

Eerbetoon[bewirk | brón bewèrke]

Hansen óntvóng versjeie óngersjeijinge. Zo waerde d'r beneump tot Ridder in de Orde van Oranje-Nassau en Ridder in de Orde van Sint-Gregorius de Grote. Hae verkreeg de Benediktpries van de sjtad Mönchengladbach en de erepenning van de Culturele Raod Limburg. De samewèrkende Limburgse vastelaovesvereiniginge gove 'm de Orde van de Gulden Humor, de hoogste Limburgse vastelaovesóngersjeijing.

In Remunj is 'n Jo Hansensjtraot nao 'm verneump. In 't sjtadspark in de Voogdiesjtraot in Remunj hingk e brónze beeldj van Jo Hansen.

In 1987 waerde op gezamelik initiatief van de Vereiniging Veldeke Limburg en de Stichting EK/CS de Stichting Jo Hansenpries opgerich. De sjtichting geuf eine keer in de drie jaor de Jo Hansenpries veur volkscultuur aan 'n vereiniging, 'n insjtèlling of 'ne persoon dae zich biezunjer verdeenstelik gemaak haet op 't gebied van de Limburgse volkscultuur.

Brónne[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Jo_Hansen&oldid=446366"