Rèkkeve

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Bilzers, es te dit dialek sjpriks.

---

't Kestiel vaan Awwen Bieze.

De Slevrouwegeboortekapel op 'tzelfde complex, dörpskèrk vaan Rèkkeve.

Rèkkeve (Nederlands: Rijkhoven) is e dörp in de provincie Belsj Limbörg en 'n deilgemeinte vaan de stad Bilze, mèt (1 jannewarie 2006) 1.324 inwoeners en 'n oppervlaakde vaan 4,57 km². 't Dörp ligk e paar kilometer zuielek vaan Bilze-stad.

Historie

Rèkkeve heet ummer bij Bilze gehuurd, tot 't in 1870 woort aofgesplits en 'n apaarte gemeinte góng vörme. 101 jaor later, in 1971, woort Rèkkeve mèt Groeëte- en Kleine-Spaan vereineg in de nui gemeinte Spaan, die evels mer zès jaor bestoont en in 1977 zelf weer bij Bilze woort ingelief.

Bezeensweerdeghede

Binne de grenze vaan Rèkkeve, noordelek vaan d'n dörpskern, ligk de commanderij Awwen Bieze (Alden Biesen), e groet kestielcomplex gestiech in 1220 en tot 't ind vaan 't ancien regime in han vaan de Duitse Orde. Op dit complex steit ouch de slevrouwekapel, gebouwd tösse in 1634 en 1638 in 'n gemingde gotisch-barokke stijl en allewijl de dörpskèrk vaan Rèkkeve.