Hulbèk

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Bilzers, es te dit dialek sjpriks.

---

Adrianuskèrk in Hoelbeek.

Hulbèk (Nederlands: Hoelbeek) is e dörp en 'n deilgemeinte in de provincie Belsj Limbörg, stad Bilze, mèt 483 inwoeners op 1 jannewarie 2006 en 'n oppervlaakde vaan 3,93 km². De bojem besteit oet zavel en leim en de groond is veur zoe'n 30% bebos. Wijer gief 't nog väöl bouwgroond en weiland. In inwoeners gemete is 't de kleinste Bilzer deilgemeinte. Tot de deilgemeinte huurt neve 't dörp Hoelbeek ouch 't gehuch 't Heike.

Historie

Hoelbeek weurt in 1372 veur 't iers geneump es Holebeke, boebij hole es 'hool', 'look' moot weure verstande. 't Maakde deil oet vaan de oetgestrekde hierlekheid oonder de börch vaan Jonckholt. Versjèllende femilies höbbe hei hierleke rechte oetgeoefend. In 1795 woort 't 'n zelfstendege gemeinte. Kèrkelek bleef 't evels tot 1934 deils oonder de parochie Willer, deils oonder Ieëgebilze valle. In 1977 woort de gemeinte Hoelbeek opgeheve en kaom 't oonder Bilze.

Monuminte

Boete 't dörp steit 't rewien vaan Jonckholt, de reste vaan die femilie hun veertiendeniewse börg op awwer, èlfdeniewse fundaminte. De börgmör zien tot op oongeveer 'ne meter weer opgebouwd. Merkweerdeg is d'n eerde wal mèt dobbel slotgrach. In de begintied vaan 't polfer deeg me dit dèks zoetot de projectiele neet direk de moer kóste rake. D'n ingaankspoort woort dweers op de wal gebouwd; in de wal zaote veer gesjötsteuriekes, wat noe nog ziechbaar is.

'n Aander monumint is de modern Adrianuskèrk oet 1926 (wie ieder gezag woort Hoelbeek pas laat 'n parochie).