Qatarees hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Qatarees hierevoetbalèlftal vertreujt Qatar in internationaol voetbalmatche.
Historie
[bewirk | brón bewèrke]Tot aon de jaore veerteg woort in Qatar gei voetbal gespäöld. In die jaore evels kaome westerlinge nao 't stäötsje veur te helpe bij de eerdoliewinning. Zij brachte de voetbalsport nao Qatar en mèt en mèt pakde de lokaol bevolking die ouch op. In 1960 woort de Qatarese Voetbalboond opgeriech en in 1970 kós veur 't iers e nationaol èlftal weure opgestèld. Dit team verloor zienen ierste match mèt 2-1 vaan Bahrein. 't WK vaan 1974 kaom te vreug, meh veur 't WK vaan 1978 sjreef 't land ziech wel in. 't Lökde ze bij lange nao neet veur ziech te kwalificere; ouch in de edities daonao zouw 't land ummer in de kwalificatie strande.
Door de jaore heer woort Qatar evels wel beter. Diverse kleinsjaolege toernoje in de regio (de Golfstaote) wiste ze te winne, en soms maakde ze ouch indrök op 't Aziatisch kampioensjap. In 1984 stoont 't team op de Olympische Speule (en daonao nog ins in 1992, in d'n tied tot dat al aon jäögteams waor veurbehawwe).
Wie in 2010 't WK vaan 2022 in 't hendeg controversieel stumming aon Qatar woort touwgeweze, spoojde me ziech veur e good èlftal op te zètte. In de nationaol competitie woort nog mie geld gepoomp es teväöre, en diverse boetelandse, veural Braziliaonse, trainers woorte aongetrokke. Ouch woorte diverse boetelandse speulers genaturaliseerd, veural Soedaneze. De inspanninge tuinde hun oetwèrking wie in 2019 't land Aziatisch kampioen woort.
Es gashier waor Qatar otomatisch geplaots veur 't WK vaan 2022. 't Èlftal zaot in 'n poule mèt Ecuador, Nederland en Senegal. Umtot 't team Aziatisch kampioen waor, woort wel get vaan ze verwach. Qatar indegde evels vrij kansloes oonderaon, en haolde es ierste gasland oets op e WK nul punte oet drei grópsmatche.