Senegalees hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Senegalees hierevoetbalèlftal vertreujt Senegal in internationaol voetbalmatche. Senegal is ein vaan de sterker len vaan d'n Afrikaanse boond AFC, al is dat neet ummer zoe gewees.
Historie
[bewirk | brón bewèrke]In de koloniaolen tied leefde 't voetbal neet hendeg, umtot ouch de Franse gein groete voetballers waore. In 1959, kort veur de oonaofhenkelekheid, späölde e Senegalees team 'ne vrundsjappeleke match tege naoberland de Gambia, op dat memint nog 'n Britse kolonie (1-2 wins veur Senegal). D'n ierste match nao de oonaofhenkelekheid in 1960 waor tege Dahomey (allewijl Benin); dee match góng mèt 3-2 verlore. In 1965 deeg 't land veur 't iers mèt aon d'n Africa Cup; hei haolde ze de veerde plaots. In 1968 kaom Senegal neet veurbij de grópsfaas; daonao waor 't land tot 1986 zelfs gaaroet neet debij. Aon kwalificatie veur 't WK veel al zeker neet te dinke.
Vaanaof 1990 góng 't beter. Dat jaor woort Senegal weer veerde op 't Afrikaons Kampioensjap (mèt väöl mie concurrentie es wie ze dat jaore daoveur gelök waor), en ouch in 1992 en 1994 haolde ze de grópsfaas. Groet waor de teleurstèlling wie ze daonao twie kier 't toernooj móste misse. Nao 'nen trökkier in 2000 volgde in 2002 'ne korten tied vaan groet succes: Senegal haolde de finaol vaan d'n Africa Cup (boe-in 't nao penanties vaan Kameroen verloor) en plaotsde ziech veur 't Wereldkampioensjap in Japan en Zuid-Korea. Hei zörgden 't veur 'ne stunt door wereldkampioen (en awwe kolonisator) Fraankriek in de grópsmatche te kloppe.
Nao dit groet jaor zakden 't langen tied in. In 't gemein plaotsde Senegal ziech wel veur de Africa Cup, meh zoeväöl indrök es vreuger maakde ze neet. Ouch op 't WK bleve ze weg, tot ze ziech in 2018 in Rusland weer vertuinde. E jaor later woorte ze weer twiede in de Africa Cup, die ze op de editie vaan 2021 zelfs wonne. Ouch plaotsde ze ziech, zij 't mèt de groetste meujte, veur 't WK vaan 2022 in Qatar.