Onno Hoes

Van Wikipedia
Naar navigatie springen Naar zoeken springen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Onno Hoes.

Onno Hoes (Leiden, 5 juni 1961) is 'ne Nederlandse politicus veur de VVD. Vaan 2010 tot 2015 waor heer börgemeister vaan Mestreech.

Biografie en carrièr[bewirk | brón bewèrke]

Hoes woort gebore in Leiden, Zuid-Holland, meh brach 't bèste deil vaan zien jäög door in Noord-Braobant. Zien ma had dao häör wortele. Ouch waore allebei zien awwers actief in de VVD. Zien ma waor ach jaor laank gemeinteraodslid in Den Bosch. Ouch ziene grampeer waor politicus: dee waor raodslid en locobörgemeister in Sint-Michielsgestel.

Al in de jaore zeveteg woort Hoes actief in de joongereorganisatie vaan de partij, de JOVD. Vaan 1986 tot 1992 waor heer veurzitter vaan de VVD in Den Bosch, boenao heer in de Provinciaol Staotefractie vaan Noord-Braobant góng. Tösse 1993 en 1998 combineerde heer dat mèt 'ne zedel in de Bossche gemeinteraod. Vaan 2001 tot 2010 waor heer gedeputeerde in zien provincie, iers veur Economische Oontwikkelinge en Internationaol Betrèkkinge, tenao veur Ecologie. In 2008 dóng heer zoonder succes mèt nao 't veurzittersjap vaan zien partij.

Op 16 september 2010 droog de Mestreechse raod häöm veur es kandidaot um Gerd Leers, dee minister in 't kabinèt-Rutte I waor gewore, op te volge. De ministerraod naom dees veurdrach euver en per 1 november 2010 góng zie börgemeistersjap in. Es börgemeister kaom heer veural in de aondach in verband mèt de 'wietpas'. Heibij góng 't um 'n nui wèt, iers in de drei zuieleke provincies getes, die vaan coffeeshops beslote clubs maakde boe allein pashawwers kemp mochte koume koupe. Boetelanders koume veur de pas neet in aonmerking. Hoes naom dit beleid enthousias euver, en hoopde zoe 't drugstoerisme, wat in Mestreech prominent te vinde waor, oet te reuje. Gevolg vaan de maotregel waor 'n sterke greuj in illegaal straothandel. Ouch verzatte de coffeeshops ziech tege de pas, soms door de wèt sumpel-eweg te negere.

Neve zien politieke functies naom Hoes in 2011 't veurzittersjap vaan 't joeds (zionistisch) orgaon CIDI op ziech.

Op 10 december 2014 maakde Hoes bekind trök te trejje es börgemeister, zoe gaw entans 'nen opvolger gevoonde waor. Hoes deeg dit um de commotie die waor oontstande nao diverse affaires umtrint zie privéleve (zuug oonder). Opvolgster woort Annemarie Penn, die op 1 juli 2015 aontraoj.[1]

In december 2016 góng heer in Den Bosch aon 't werk es veurzitter vaan 't euverlègkorgaon vaan cultuurinstèllinge in die stad.[2] In november 2017 woort heer woernummende börgemeister vaan de gemeinte Haarlemmermeer.[3]

Persoenelek[bewirk | brón bewèrke]

Onno Hoes is 't awwer broor vaan actries Isa Hoes (*1969). Ze zien de kinder vaan 'ne kathelieke pa en 'n joedse ma. Sinds jaor en daag identificeert Hoes ziech mèt 't joededom.

Hoes is homoseksueel. In 2001, kort nao de legalisering vaan 't homohouwelek, trojden 'r mèt ziene partner Albert Verlinde. Dit houwelek trok väöl aondach vaan de boulevardpeers. In oktober 2014 maakde ze bekind te goon sjeie, naotot ieder nuits euver 'n affair vaan Hoes nao boete waor gekoume.[4] In de loup vaan 2014 doke nog mie affaires oet Hoes zie privéleve op. Dao-oonder waor ein veuropgezatte affair vaan sjendaolumroop PowNews, boe-in heer de zoegezagten amant oonder mie slechte dinger euver de gemeinteraod zag. Dit maakde oetindelek tot Hoes mós aoftrejje.[1]

In zienen tied es börgemeister tuinde Hoes ziech fan vaan MVV.

Bron[bewirk | brón bewèrke]

Dit artikel is gebaseerd op 't corresponderend Nederlandstaoleg artikel, en wel in dees versie.

Rifferenties[bewirk | brón bewèrke]

  1. 1,0 1,1 dagblad De Limburger - Eind aan onzekerheid Hoes
  2. Brabants Dagblad - Onno Hoes nieuwe voorzitter DOCIS Den Bosch
  3. Nu.nl - Onno Hoes waarnemend burgemeester van Haarlemmermeer
  4. Nu.nl - Albert Verlinde en Onno Hoes gaan scheiden
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Onno_Hoes&oldid=423056"