Nerotere

Dit artikel is gesjreve (of begós) in 't Neroters. Laes hie wie v'r mit de versjillende saorte Limburgs ómgaon.

---

Lambertuskèrk

Nerotere (Nederlands: Neeroeteren) is e dörp in het Noeërd-Oeëste van de Belzje prëvincie Limburg det óppe grens van het Kempës Plateau en het Maasland ligk. Nerotere waas 'n zelfstandige gemeintj viēr et in 1977 met Opotere bi-j Mezeik is ingedeiltj. Nerotere is verneumd noa de Oter of Bosbiēk, 'n biēk die doeër alle drie de Mezeikse deilgemeinte leip.

Doeër Nerotere stroumt ouch de Zuud-Willemsvaert. Het centrum, Voeërshoeëve en de Hei ligke ten wèste vanne knaal en Berg-Waterloeës ten oeëste.

Toponymie

Nerotere kump viēr de ieërste kieër gesjraeve viēr in 952 als Uotra en in 1202 als Utere. De haemkundige kring van het dörp, Wotra, verwi-jst er ouch noa. Pas vanaaf de 14de iēw kump 'Neer-' veur in de noam.

Gesjiedenis

De strieëk rontelom Nerotere waert al langk bewoeëndj; dao zeen de talrieke vondste oeët het Neolithicum bewi-js van. In de teende iēw hiērde Nerotere bi-j de Abdi-j van Thorn. Het Vorstendom Thorn sting in voogdsjap ónger het Graafsjap Loeën en vanaaf 1366 het Prinsbisdóm Luuk. Tussen de abdis van Thorn en de prins-bisjop van Luuk woare der dêk conflicte iēver de rechte.

Bezeenswaerdig

Interieur Lambertuskèrk mèt apostelebalk, heiligebeelde en marianum

In de ouw dorpskern steit de mergele Sint Lambertuskèrk oet de 15e en 16e iēw aanne Oter, in Maasgotiek. De tore is van bakstein op 'n helsteine basis mèt óppe hook helsjteine verseringe. Hae is geboewdj in 1711-1721 óppe ploats van 'ne awwe Romaanse tore, dae in 1708 inein is gestortj.

De plëfóng is riek verseerdj. Viēr 't koor hingk 'ne apostelebalk mèt de houte baeldhouwwèrke van alle apostele oeët de 16e iēw. Derboeëve bevingk zich 'n houte calvarie mèt kruus. Aan de zule, mèt maaskapitele, hange houte gesnaeje baelde van heilige oeët de 16e iēw: Christoffel, Christus op de kouwe stein, Lambertus, Rochus, Jaokob de Mieërdere, Barbara, Antonius, Lucia, Renilde en Joris. E gedeilte vanne baelde weurt toegesjrieëve aanne meister van Nerotere. Midde inne kèrk hingk 'n Marianum, ouch vanne meister van Elsloo. 't Is ein van de twiè Marianums in Belsj. 't Anger hingk in de kèrk van Zoutleeuw. 't Laatgotisch deipvont van blauwstein haet e gaelkoeëpere dèksel oeët 1699. De barokke órgelkas is oeët 1742.

In 't dörp is nog 'n aantal aw hoezer en boerderieje bewaerdj.