Neerkan

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Kanners, es te dit dialek sjpriks.

---

Heilig graafkapel in Neerkanne 2005

Neerkan ies 'n buurtsjap in Kan (Kanne) in de gemeinte Riemst in Belsj (Belsj Limburg) vlak bie de grens van Nederland (Nederlands Limburg). 't Ies gesitueerd tösje de Jeker en 't Albaerkanaal. Aan de ander zie van diet kanaal liek de buurtsjap Opkanne. In Neerkan weurt Limburgs en Nederlands gekald.

De gesjiedenis van 't gehuch ies nauw verweve mèt 't gelieknamige kestiel Neercanne, dat vlakbie euver de Nederlandse grens liek. In 1843 zörgde de toenmalige eigenaer, Oranjegezinde baron van Thier, d'r veur dat zien landgood in Nederland kaom te liegke. De landsgrenze loupe daorum geforceerd door en um Neerkanne en Kanne heen.
In de 14e ièw ies sjpraoke van 'n kesjtièl Agimont in de hièrlikheid Neerkan. 't Landhoes haet allewiel de functie van hotel-restaurant en dreug de naam château Neercanne.

In de buurt bevinge ziech hellingbösj en mergelgrotte. Van de gewonne mergelsjtein zint hie väöl häöf en hoezer geboewd. Neerkan huèrt bie de parochie Kan. Euver de grens, in de buurt van 't kesjtièl liek op 'ne heuvel 't wiengood de Apostelhoof en dao tegeneuver, in 't dal van de Jeker, de hoof en wiengaard Nekum.

Op de hook van de Kapelsjtraot, 'n paar hónderd maeter van de grens, sjteit 'n mergele Heilig Graaf-kapel oet 1647. De sjtiel ies barok en klassiek. 't Oarsjprónkelike gebuuwke ies geboewd door 'ne tummerman Herman Jekermans, dae 'n belofte vervulde. Binne in de kapel, die in de loup van ièwe diverse kière vergruèt ies, bevingk ziech 'n replica van de Heilig Graaf-kapel van Jezus in Jeruzalem. In 1714 kreeg 't zien hudig aanzeen. Op 't daak sjteit 'n klokketeurentsje.