Nederlands damesvoetbalèlftal

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Sherida Spitse, recordinternational veur Nederland.
Vivianne Miedema, topscoorster veur Nederland.

't Nederlands damesvoetbalèlftal vertegewoordeg Nederland in internationaol voetbalwèdstrije. In Nederland heet 't langen tied gedoord ietot vrouwevoetbal groet woort. Roond 2010 kaom dao evels veraandering in. De bijnaom vaan 't èlftal is De Liewinne (Nederlands: De Leeuwinnen) of, wie bij alle nationaol sportteams vaan Nederland, Oranje (eventueel Oranjedames).

Historie[bewirk | brón bewèrke]

't Nederlands vrouwevoetbal woort veur 't iers georganiseerd in 1955, mèt de opriechting vaan de Nederlandse Damesvoetbalboond (NDVB). De NDVB had ouch 'n eigen èlftal, wat op 1956 zienen iersten interland späölde (2-1 verlees tege Wes-Duitsland). Pas in 1971 woort 't vrouwevoetbal ingelief bij de KNVB. Heimèt woort 't èlftal ouch officieel erkind door de UEFA en de FIFA. D'n iersten officiëlen interland waor op 17 aprèl 1971 in Hazebroek, tege Fraankriek (4-0 verlees). Pas in 1974 wis Oranje veur 't iers te winne, en wel vaan Zwitserland (0-3). De niveauversjèlle waore nog zier groet in deen tied: in 1977 wis Nederland mèt 12-0 vaan Israël te winne, in 1981 woort mèt 7-0 verlore vaan Zwede.

Al deen tied späölde de Nederlandse vrouwlui allein vrundsjappeleke matche, umtot EK's en WK's veur vrouwlui nog neet bestoonte. 't Ierste EK woort in 1984 gehawwe; Nederland wis ziech dao neet veur te plaotse. De koumende jaore zouw Nederland ziech ouch noets plaotse, ouch neet veur de WK's die vaanaof 1991 woorte georganiseerd. Nao 2000 evels begós 't tij te kiere. Ummer mie meidskes gónge op voetbal; naomaote die generatie volwasse woort, góng 't niveau vaan 't vrouwevoetbal umhoeg. Sinds 2007 speule de vrouwlui ouch betaold voetbal. Heidoor kós Nederland ziech plaotse veur 't EK vaan 2009, boe ze zelfs de haaf finaal haolde. Dit brach 't vrouwevoetbal in Nederland sterk oonder de aondach (zoe woorte veur 't iers matches direk op de tv oetgezoonde), al waor ouch kritiek op de verdeidegende, 'oon-Nederlandse' tactiek vaan coach Vera Pauw.

Tenao wis Nederland ziech ouch te plaotse veur 't EK vaan 2013 en 't WK vaan 2015. 't EK vaan 2017 woort in eige land gehawwe, wat 'nen wijere greuj in publiciteit en populariteit mètbrach: alle grópsmatche vaan Oranje waore oetverkoch. Nederland góng door es grópswinner en won oetindelek de finale tege Denemarke. Dit maakde e volksfies in gans 't land los. Staarspäölster Lieke Martens woort op 't FIFA-gala vaan dat jaor verkoze tot bèste späölster vaan de wereld, Sarina Wiegman tot bèste coach.[1]

Op 13 november 2016 plaotsde Oranje ziech, nao 'n meujeleke kwalificatie, veur 't Wereldkampioensjap vaan 2019.[2] Op dit toernooj presteerde ze evels bove verwachting good: Oranje haolde de finaal, boe-in oetindelek de Vereinegde Staote te sterk bleke.

Veur 't EK vaan 2022 (oersprunkelek gepland veur 2022) waor Nederland zeker neet de favoriet. Wiegman waor intösse coach vaan Ingeland gewore en vervaange door de Brit Mark Parsons. Daobij waor sommege vedèttes in d'n aonluip oet vörm. Nederland kaom oetindelek tot de kwartfinaal. Ouch op 't verdeidegend speul waor väöl kritiek. Nao aofluip woort Parsons oontslage es coach.

Records[bewirk | brón bewèrke]

Recordinternational is Sherida Spitse, die sinds 2006 veur Oranje oetkump en (per 10 augustus 2022) 205 interlands heet gespäöld. Recordtopscoorster is Vivianne Miedema, die sinds 2013 veur Oranje späölt en (per 10 augustus 2022) 94 gole heet gemaak. Recordbondscoach is Sarina Wiegman, die vaan 2017 tot en mèt 2021 79 matche leide.

Fancultuur[bewirk | brón bewèrke]

't Damesvoetbal waor in Nederland langen tied geine kieksport vaan beteikenis. De populariteit góng evels sterk umhoeg nao 't EK vaan 2017. Sindsdeen zuut me bij matche vaan de Liewinne ouch dèks in 't oranje gekleide supporters, mèt 'n geliekaardege fancultuur wie bij de manslui.

In 2017 kaom ouch 't ierste populair voetballeedsje: Wolter Kroes bewèrkde zienen hit Viva Hollandia oet 2008 (oersprunkelek Viva Colonia vaan de Höhner) veur 't vrouweteam. Veur 't WK vaan 2019 kaom zengeres Maan mèt Ik kom eraan, wat 'n campagne vaan supermerret Albert Heijn begeleide.

Zuug ouch[bewirk | brón bewèrke]

Rifferenties[bewirk | brón bewèrke]

  1. Nu.nl - Lieke Martens op FIFA-gala uitgeroepen tot beste speelster ter wereld
  2. Nu.nl - Voetbalsters plaatsen zich ten koste van Zwitserland voor het WK