Lieke Martens

Van Wikipedia
Naar navigatie springen Naar zoeken springen
Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Baergs, as te dit dialek sjpriks.

Lieke Martens op 't EK vaan 2017, in 'ne match tege Noorwege.

Lieke Elisabeth Petronella Martens (Baerge (Bergen), 16 december 1992) is 'n Nederlands-Limbörgse voetbalster, die späölt es aonvallende middeveldster en sinds 2011 oetkump veur 't Nederlands èlftal. Ze waor ein vaan de groete stare vaan 't Europees kampioensjap damesvoetbal 2017 en woort daomèt ouch lendelek bekind boete de wereld vaan 't vrouwevoetbal.

Biografie[bewirk | brón bewèrke]

Martens begós op viefjaorege leeftied te voetballe bij RKSV Montaignards in häör geboortedörp. Dao doorleep ze de F-, E-, D- en C-jäög. Roond häör achste kraog ze häör ierste oetneujing veur e regioèlftal. Nao de C-jäög stapde ze in 2005 euver nao Olympia '18 in Boksmaer (Boxmeer), op aondringe vaan de toenmaolege boondscoach Vera Pauw. In 't lèste jaor vaan häören tied bij Olympia deeg ze mèt aon 't HvA-projek vaan de KNVB.

In 2009 begós Martens aon 'n carrièr in 't profvoetbal. Ze späölde ei sezoen bij sc Heerenveen, boe ze in 18 matche twie kier scoorde. Daonao stapde ze euver nao VVV Venlo, de club oet häör buurt die in 't sezoen 2010/11 zjus mèt vrouwevoetbal begós. Dao späölde ze 20 kier en scoorde ze nege gole.

Al in 2010 had Martens mètgedoon aon 't EK vrouwlui oonder de 19. Nederland kaom heibij tot de haaf finaal; Martens scoorde veer kier en woort daomèt gedeild topscoorster vaan 't toernooj. 't Jaor dao-op debuteerde ze veur 't ierste èlftal in 'nen oetmatch tege China.

Nao e jaor VVV góng Martens nao Standard Luik, wat daan in de BeNeLeague späölde. Al in häöre debuutmatch, in de BeNe Supercup tege FC Twente, scoorde ze twie kier. Dat gans jaor zouw ze 25 kier speule en neet minder es 17 kier score. Heidoor trok ze ouch boete de Benelux de aondach en teikende ze in jannewarie 2012 bij FCR 2001 Duusbörg. Door 'n administratiefout kós ze dao evels pas nao 't ind vaan 't sezoen terech. Nao twie jaor stapde ze euver op de Zweedse competitie: vaan 2014 tot 2016 späölde ze bij Kopparbergs/Göteborg FC, daonao nog e jaor bij FC Rosengård. Oonderwijl deeg ze ouch mèt aon 't Wereldkampioensjap vaan 2015, boe ze oonder mie d'n insegste gool scoorde in de eupeningsmatch tege Nui-Zieland.

Häöre groetsten doorbraok kaom evels in 2017. Op 't Europees kampioensjap, gehawwe in Nederland, veel ze in de grópsfaas al op. Tegen 't Belsj maakde ze de winnende gool en ouch in de kwartfinaal tege Zwede scoorde ze. Nao de finaal tege Denemarke, die Nederland mèt 4-2 won en boe Martens ouch weer scoorde, woort ze oetgerope tot späölster vaan 't toernooj. Häör optrejje maakde tot zoewel d'n UEFA es de FIFA häör later dat jaor verkoze tot späölster vaan 't jaor.

Nao 't EK góng Martens speule veur FC Barcelona.

Bron[bewirk | brón bewèrke]

Dit artikel is gebaseerd op, en deils vertaold oet, 't corresponderend Nederlandstaoleg artikel, en wel in dees versie.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Lieke_Martens&oldid=430396"