Amerikaons damesvoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Amerikaans damesvoetbalèlftal vertreujt de Vereinegde Staote in internationaol voetbaltoernoje. In tegestèlling tot 't hierenèlftal vaan 't land huurt 't damesèlftal tot d'n absolute wereldtop. Gein aander land is sinds jaor en daag in 't damesvoetbal zoe sterk. Vaan de ach WK's in 't damesvoetbal die tot en mèt 2019d, heet 't Amerikaans team 'rs veer gewonne.
Historie
[bewirk | brón bewèrke]Voetbal waor in de VS laank geine groete sport bij welk geslach daan ouch. In de jaore 1970 begós toch get vaan intrèsse te greuje. Dit had tot gevolg tot de sport ouch vaanoet de universiteite (in de VS centraol in de sportwereld) subsidie kraog. Voetballende vrouwlui voonte noe tot dit neet allein veur de manslui mós gelle; zoedoende kaom ouch geld veur 't vrouwevoetbal vrij. In 1985 woort d'n tied riep geach veur e nationaol èlftal. D'n iersten interland, op 18 augustus vaan dat jaor oet tegen Italië, woort mèt 1-0 verlore.
In de twiede hèlf vaan de jaore 1980 greujde de sport snel. In 1991 bleke de Amerikaanse vrouwlui zelfs oonverslaonbaar good: ze wonne mèt euvermach d'n ierste CONCACAF-beker en wonne daonao ouch 't ierste WK veur vrouwlui. Loupende de jaore 1990 zouw 't voetbal bij allebei de geslachte in populariteit greuje, meh bij vrouwlui (die neet zoe'n sterke concurrentie vaan traditioneel sporte wie hoonkbal, basketbal en American football hadde) väöl snelder es bij manslui. Ouch bij de Olympische Speule vaan 1996 in eige land, boe vrouwevoetbal veur 't iers op 't program stoont, pakde ze de gouwe medalje. 'tzelfde gebäörde bij 't WK vaan 1999, ouch in eige land: 90.000 bezeukers zaoge in de Rose Bowl in Pasadena wie 't gasland China nao penanties versloog.
In de jaore 2000 leek de rèk get droet. 't Amerikaans team kaom al-evel ummer minstens tot de haaf finales op WK's, meh woort in 2003, 2007 en 2011 geine kampioen mie umtot de concurrentie vaan veural Europese teams (Duitsland en Scandinavië) waor touwgenome. In 2015 waor 't team evels weer wie vaanajds oonklopbaar: matche tege Duitsland en Japan woorte mèt euvermach gewonne. Ouch op 't WK vaan 2019 maakden 't team groeten indrök, oonder mie door 'n 13-0 euverwinning op Thailand. Oetindelek pakden 't team de veerden titel door in de finaal Nederland te kloppe.