Limbörge

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Mèt d'n term De Limbörge weurt nao de grensregio verweze dee allewijl besteit oet de Belsj pervincie Limbörg en de Nederlandse gelieknaomeg pervincie Limbörg. Um ze vaan mekaar aof te sjeie weure ze dèks Belsj Limbörg en Nederlands Limbörg geneump. In prinsiep rifferere de Limbörge dus nao 't gebeed wat oets, oonder 't Vereineg Keuninkriek vaan de Nederlen, de Pervincie Limbörg oonder de Vereinegde Nederlen waor. Aongezien me allewijl zoe is geweend aon 't idee tot 't twie pervincies gief mèt de naom Limbörg sprik me daomèt dèks vaan de Limbörge in pluraliteit.

Bis 1795 veel 't oeters noordelek gedeilte vaan de Pervincie Luik ouch bij Limbörg, roontelum 't stedsje Limbourg. Dit is daan ouch 't pläötske boe de allewijl pervincies hunne naom aon te daanke höbbe. 'n Deil vaan dee regio sprik ouch Platdiets, 'n Zuidnederfrankisch dialek wat op force vaan väöl taolweitesjappers in feite Limbörgs is. In d'n allewijl spreektaol weurt dit stökske Luik evels bekans noets mètgerekend tot de Limbörge.

Spreektaol[bewirk | brón bewèrke]

Mèt de opkoms vaan Europees integratie is d'n term gengbaar gewore bij bedrieve die grenseuversjrijend zien en aktief zien in bei pervincies. Hei weurt d'n term "Limbörge" dus gebruuk es 'ne gengbaren term in de advertentiewereld (Nederlandstaoleg veurbeeld: "Het beste X-bedrijf in de beide Limburgen").[1]

Literatuur[bewirk | brón bewèrke]

D'n term "De Limbörge" is, oonder aandere, gebrukelek in de historische weitesjappe. Zoe gief 't bekènde Nederlandstaolege wèrke wie Het lokkend licht: Volksverhalen rond de Maas in beide Limburgen van Kanne tot Kessenich en van Eijsden tot Mook vaan Leo Janissen, Moeilijke jaren voor de beide Limburgen 1914-1918 vaan G.J.B. Verbeet en Geschiedenis van de beide limburgen vaan W.J. Alberts. Ouch 't weitesjappelek tiedsjrif vaan de Universiteit Mestreech, De Maasgouw, stèlt ziech bezeg te hawwe mèt "beide Limburgen". Ouch gief 't literatuur die dizzen term hanteert, wie Mysterieuze verhalen uit de beide Limburgen vaan Jaak Venken.

Cultureel claims op de Limbörge[bewirk | brón bewèrke]

Ouch 't Aajd-Limbörgs Sjöttersfees, ein vaan de wieneg euvergebleve tradities oet beij pervincies, hanteert dèks 't idee vaan twie Limbörge[2]. Zoe kin d'n term me d'r aon rappelere tot 't mie es ein Limbörg gief.

Me zou kinne stèlle tot de Limbörge 'n gezameleke cultuur höbbe. Zoe is 't groetse gedeilte vaan bei pervincies Limbörgstaoleg, zien ze dominant katheliek, gief 't d'r gezamelek tradities wie Vastelaovend en umerme ze dèks gelieksoorteg symbole. Zoe zien de veendels vaan Limbörg vergeliekbaar en höbbe ze exak 'tzelfde volksleed: Limburg mijn Vaderland. Sommege historici, wie Ad Knotter, gebruke d'n term evels um zjus te beargumentere tot 't gaaroet gein gezameleke Limbörgse cultuur gief en tot 't dus belaangriek is um euver "twie Limbörge", neet eint, te spreke [3].

Rifferenties[bewirk | brón bewèrke]

  1. https://www.wijlimburg.nl/nieuws-overzicht/erik-bessems-makelaardij-maastricht-neemt-machon-in-lanaken-over/
  2. https://www.trouw.nl/nieuws/verzet-gebroken~b9fff776/?referrer=https%3A%2F%2Fwww.google.com%2F
  3. https://cris.maastrichtuniversity.nl/en/publications/175-jaar-beide-limburgen-waarom-ze-toch-niet-bij-elkaar-horen
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Limbörge&oldid=449327"