Heuvellandlijn

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Trajek vaan de Heuvellandlijn in zuielek Limbörg.

De Heuvellandlijn is 'n lijndeens vaan Veolia in 't zuie vaan Nederlands Limbörg die sinds 2006 weurt oonderhawwe en zien veurgengers diverse NS-deenste heet. De lijn löp vaan statie Mestreech Randwiek nao statie Kèrkraoj Centrum en v.v.. Twie kier in 't oor veurt 'ne stoptrein dreuver. Op 't deil tösse Mestreech en Heerle veurt ouch twie kier in 't oor 'ne sneltrein, dee oonderweeg nog stop in Meerse en Valkeberg.

Historie

De versjèllende deile vaan 't trajek höbbe 'n gans diverse historie. 't Deil vaan Randwiek tot Mestreech maak deil oet vaan de lijn Luik - Mestreech, in 1861 aongelag door de maotsjappij LM. 't Deil vaan Mestreech tot aon Sjin huurt vaanajds bij de spoorlijn Aoke - Mestreech, geëupend in 1853 door de AM. (Sinds 1992 veurt geine gewoene trein mie euver de res vaan dat baonvak, allein deils nog 'ne museumtrein.) 't Baonvak tösse Sjin en Heerle woort in 1914 door de Staotsspoorweeg aongelag. Vaan Heerle geit 't wijer nao statie Landgraaf; dit stök is in 1896, ouch door de Staotsspoorweeg, aongelag es oonderdeil vaan de lijn Zittert - Hertseroa (Herzogenrath; de Landgraafse statie hètde toen nog statie Sjaasberg). 't Lèste stök nao Kèrkraoj is oonderdeil vaan 't Mieljoenelijnse. Dit stök leep vreuger nao Kèrkraoj door tot aon Zumpelveld; 't trajek is noe es museumspoor ingeriech.

't Stök tösse Mestreech en Heerle woort al in 1949 geëlektrificeerd. 't Deil vaan Mestreech tot aon de grens mós evels wachte tot 1985. Ei jaor later volgde ouch 't deil nao Kèrkraoj.

Tot 2006 waor, wie gezag, de NS exploitant vaan de lijn; in dat jaor naom Veolia 't euver. Aonvenkelek gebruukde dees maatsjappij euvergeplekde treinstèlle vaan de NS; in 2008 góng ze op eige materieel euver. In 2011 laog 't aontal reizegers op 3,7 mieljoen; die maakde same 56,4 mieljoen reizegerskilometers.

Trajek en staties

De Heuvellandlijn verlöp zoe:

Mestreech Randwiek

0 kilometer

Dees statie woort op 31 mei 1987 opegedoon en bedeent Randwiek, oonder mie de Universiteit Mestreech. Tösse 1861 en 1867 gaof 't oongeveer op dezelfde plaots 'n statie veur Hier. Ouch d'n internationaolen trein vaan Mestreech nao Luik en v.v. stop hei.

Mestreech

1 kilometer

Statie Mestreech góng in 1853 ope en laog tot 1907 op Meerses groondgebeed. 't Statiegebouw oet 1913 is e rieksmonumint. Mestreech is e belaankriek transferium. Me kin hei euverstappe op de sprinter nao Zittert, d'n intercity nao Alkmaar/Schagen en d'n al geneumden trein nao Luik, zoewie op e groet aontal böslijne.

Mestreech Noord

3 kilometer

In Beatrixhave, kortbij Meriejeweerd. Dees statie góng pas op 17 november 2013 ope. Vreuger (tösse 1853 en 1938) laog hei in de buurt de statie Lummel.

Meers(j)e

7 kilometer

Statie Meerse heet vaanaof de opening vaan de spoorweeg in 1853 bestande. 't Statiegebouw oet 1900 is e rieksmonumint. Neve de stoptrein stoppe ouch de sneltrein en diverse bösse hei.

Houtem-Sint Gerlach

10 kilometer

Hoofartikel: Sjtasie Houtem-Sint Gerlach

Aanders es de veurege góng dees statie pas in 1890 ope. Wie me oet de naom al kin raoje, gaof 't vreuger in Houtem twie staties: get ieder gaof 't nog ouch 'n statie in Vroenhof, die in 'tzelfde jaor opegóng meh in 1936 woort opgeluf. 't Statiegebuiwke oet 1903 is uniek umtot 't es insegste in Nederland nog vaan hout is.

Valkeberg

13 kilometer

Hoofartikel: Sjtasie Valkeberg

In Valkeberg stop ouch 'ne sneltrein. De statie besteit sinds de opening vaan de lijn in 1853. Gans bezunder is 't melgere stationsgebouw, boevaan de ajdste deile in 'tzelfde jaor zien opgetrokke. Hei begint ouch nog 'ne museumlijn vaan Valkeberg nao Zimpelveld.

Sjin

16 kilometer

Ouch de statie vaan Sjin gief 't al sinds 1853. Tösse 1914 en 1992 waor Sjin 'n 'vörkstatie', umtot hei de lijn ziech splitsde in 'n tak nao Heerle en ein nao Aoke. 't Huieg gebuiwke oet 1913 (obbenuits e rieksmonumint) is dao speciaol op gebouwd. De zuieleke lijn nao Aoke weurt allein nog door de museumtrein gebruuk.

Klumme-Ranzel

18 kilometer

De statie Klumme-Ranzel góng op 1 miert 1915 ope. 't Statiegebouw kaom al in 1913 veerdeg en is ouch weer e rieksmonumint.

Voelender

22 kilometer

Statie Voelender góng op dezelfden ope wie Klumme-Ranzel, is vaan dezelfden arsjitek (George van Heukelom) en zuut bekans 'tzelfde oet.

Heerle Woenboulevard (Heële Woeënboulevard)

23 kilometer

Dees halte kaom op 13 juni 2010 debij veur de Woenboulevard in Heerle.

Heerle (Heële)

24 kilometer

Statie Heerle góng op 1 mei 1896 ope en ligk aon de door Henri Sarolea betaolde lijn Zittert-Herzogenrath (zuug bove). Mèt twie perrons is 't rillatief klein; toch vertrèk hei e groet aontal treine. Nao 't noorde goon de intercity nao Schiphol ('s aovends nao Zittert, boe me op d'n trein oet Mestreech kin euverstappe) en de sprinter nao Zittert, nao 't zuie geit d'n internationaolen trein nao Dure.

Heerle de Kissel (D'r Kissel)

25 kilometer

Sinds 9 december 2007 in gebruuk bij Veolia en de Duutsje baanlijn nao Dure (zuug direk bove).

Landgraaf (Lankgraaf/D'r Sjeet)

27 kilometer

Al bij de opening vaan de spoorlijn in 1896 opegegaange, es statie Sjaasberg: de gemeinte Landgraaf bestoont nog neet. 't Gebuiwke woort in 1893 opgetrokke. De naomsverandering gebäörde in 1986, veer jaor nao de gemeinteleke fusie. Sinds 2012 heet dees statie verlengde perrons. Die zien bedoeld veur groeter treine mèt Pinkpopgengers te kinne doen stoppe.

Eygelshoven (Egelze/D'r Hopel)

29 kilometer

Opegedoon pas in 1949 es statie De Hopel. Tot 1966 droog 't dee naom, want de eigeleke statie Eygelshoven laog kortbij de dörpskern. Bij de sleting vaan die statie góng de naom euver op de aw statie Hopel, al laog die neet binne de gemeinte Eygelshove meh ouch toen al in de gemeinte Kèrkraoj.

Chevremont (Sjevemet)

31 kilometer

Ouch pas in 1949 opegegaange. 't Statiegebuiwke oet 1960 woort in 2002 gesloop.

Kèrkraoj Centrum (Kirchroa)

33 kilometer

Allewijl 't indpunt vaan de Heuvellandlijn, meh ze heet in väöl aander situaties gelege. Zoe góng dees statie in 1933 ope, um e jaor later bij de opening vaan de Mieljoenelijn weer veur persoeneverveur te weure geslote. In 1949 góng ouch dees statie weer ope. Mèt twie spore is ze mer klein, meh hei stoppe wel versjèllende böslijne (ouch regionaole). Kèrkraojenere die nao 't noorde wèlle, mote iers in de sprinter ietot ze in Heerle kinne euverstappe; veur 'n reis nao 't boeteland kin me beter de bös pakke.

Bron

Dit artikel is gebaseerd op, meh neet vertaold oet, 't corresponderend Nederlandstaoleg artikel zoewie artikele euver de versjèllende staties apaart.