Hageland

Dit artikel is gesjreve in 't Venloos. Ómdat 't plaatsgebónge is, maogs doe 't ómzètte nao 't Hôles, es te dit dialek sjpriks.

't Hageland is 'n streik in 't oeëste van Vlaoms-Braobant en in 't weste van Bels Limburg. 't Gebeed leejt tösse de staej Scherpenheuvel-Zichem, Aarschot, Leuve, Tienen en Diest en tösse de reviere de Dijle, de Demer en de Gete. T'n naorde van de streik ligke de Kempe. T'n zude van Tienen geit zie euver in de Druig-Haspengouw. Echte grenze van 't Hageland gief 't, wie beej de Kempe, neet. Op touristische publicaties wuurt beejveurbeeld 't gebeed t'n zude van Tienen ouch mitgeraekend tot 't Hageland, mer veural um commerciële doeleinde. De vakgróp van de Universiteit van Gent haet 't Hageland aafgebakend op basis van typerende landschapselemente. 't Is 'n leech gloojend heuvelland mit parallele oeës-wesstructuur van beböste rugke en valleie mit riebeweuning. Get angers typisch is det 't Hageland bedèk is mit getugeheuvels. Die zeen óntstande toen gans Vlaondere nog bedèk waas mit 'n tropische zieë. De zandbanke zeen laoter heuvels geweure en beej 't waegtrèkke van de zieë erodeerde de zachte baovelaog, waomit 't hardere iezerzandstein aan de oppervlakde kaom. Ouk geologisch ónderscheid 't Hageland zich dös van de Druig-Haspengouw. In die lèste streik besteit de boejem oét zieër vröchbare löss, mit dao-ónder kriet.

't Gebeed beej Hôle in Bels Limburg behuurt ouk tot 't Hageland. Det stedsje woort ónder 't Franse bewind van Vlaoms-Braobant aafgescheurd en beej Limburg geveug.

Geschiedenis

De naam "Hageland" is nog neet ald. De aldste vermelding dateert oét 1528. De naam beteikent land begreujt mit kreupelholt (hage) en 't woort gegaeve nao de groeëte óntginninge in de middeliewe, toen 't Hageland nog 't einigste euvergeblieve bösgebeed van 't hertogdom Braobant waas.

Fruitteelt

't Hageland steit bekind um zeen fruitteelt. Det kump doordet 't naeve de zieër vröchbare Haspengouw leejt. 't Toerisme is dao ouk deils op ingerich. 't Gief bewaegwiezerde bloesemroutes en eder jaor gief 't speciale evenemente die gerelateerd zeen aan de fruitteelt. Ouk wuurt in 't Hageland wien gekweek. De streik is 't ieërste officieel erkinde wiengebeed van 't Bels. De nao 't zude gerichde hellinge zeen zieër gesjik veur 't tele van wiendroeve.

Vólksvertellinge

Wie in de Kempe, is 't Hageland riek aan vertellinge euver vraeme verschiensele, wie dwaallichskes. Ouk hekse zeen dök ónderwerp van de sages.

Verkieër

D'n A2 doorkruuts 't Hageland in oeës-wesrichting. Dizze waeg loup vanaaf de naordkant van Leuve via 'n trajèk t'n zude van Aarschot en 'n trajèk t'n zude van Diest richting Limburg.

Referentie

Dit artikel baseert zich op 't corresponderend artikel op de Nederlandse, de Wes-Vlaomse en de Ingelse Wikipedia.