Gemeinteleke herindeiling op 't Belsj
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
In 't Belsj zien op diverse meminte gemeinteleke herindeilinge gewees.
In tegestèlling tot Nederland, boe soms al in de negentienden iew op groete sjaol gemeintes woorte opgeluf, bleef de gemeinteleke indeiling vaan 't land tot laank nao d'n Twiede Wereldoorlog oonveraanderd. Noe en daan fuseerde ins twie gemeintes; zoe kaom de gemeinte Laken in 1921 bij de stad Brussel, boe 't ouch noe nog es 'nen oetluiper bij huurt. Ouch in de jaore viefteg en jaore zèsteg gónge get gemeintes same. Zoe woorte in 1958 Berendrecht, Zandvliet en Lillo bij Antwerpe geveug, boenao die dörper móste plaotsmake veur de oetbreiing vaan de have.
De groete herindeilinge voonte evels plaots in de jaore zeventeg. In väöl klein gemeintes leet de bestuurskrach nao, umtot 't te wieneg competente lui gaof veur de gemeinte te besture. Zoe had de gemeinte Zoutenaaie mer 31 inwoeners, wat beteikende tot zoeget alle volwasse maanslui in de raod zaote. Väöl klein gemeintes woorte daorum in 1970 en 1971 samegeveug of ingelief bij 'n groeter gemeinte. De zoe oontstande situatie góng väöl lui nog neet wied genóg. Al in 1977 volgde 'n twiede runde boebij nog mie gemeintes, inclusief väöl die pas zès of zeve jaor bestoonte, woorte opgeluf. Gemeintes vaan zoe'n 10.000 inwoeners woorte noe de norm.
Daonao bleef 't laank stèl op dit gebeed. Groete oetzundering waor de oetbreiing vaan de stad Antwerpe, die in 1983 häör veurstei annexeerde. Pas in d'n einentwintegsten iew kaom de discussie weer serjeus op gaank. De Vlaomse regioregering besloot 't initiatief daoveur bij de gemeintes zelf te lègke en 't neet vaan bovenaof door te duie. Op 1 jannewarie 2019 fuseerde diverse Vlaomse gemeintes. Zoe oontstoonte in Limbörg de fusiegemeintes Audsberge en Pelt. Ouch in de res vaan 't land weujt de discussie. Zoe goon dèks stumme op um de stad en 't gewes Brussel same te veuge. De noe nog 19 gemeintes vaan 't Brussels Hoofsteidelek Gewes zouwe daan distrikte mote weure, wie dat in Antwerpe al 't geval is.
Faciliteitegemeintes kinne veur de wèt neet fusere mèt gemeintes die die faciliteite neet höbbe. Daorum is de gemeinte Herstap, 'n Nederlandstaolege gemeinte mèt faciliteite veur Franstaolege, noets bij Tóngere geveug, allewel tot 't minder es 100 inwoeners heet.