Pelt (fusiegemènt)

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Pelter, es te dit dialek sjpriks.

Pelt is de naom vaan 'n fusiegemeinte in Belsj Limburg die op 1 jannewarie 2019 is oontstande oet de aw gemeintes Nerpelt en Euverpelt (in de volksmoond ouch gewoen Pelt geneump). De gemeinte besleit 'n oppervlaakde vaan 83,63 km² en heet zoeget 32.500 inwoeners.

Vörming

Nao de groete fusie vaan 1977 voont me 't op 't Belsj langen tied neet nujeg de gemeintes nog groeter te make. Roond 2010 kaom die discussie evels oetgebreid: gemeintes hadde väöl take debijgekrege en móste ummer mie samewèrke in intercommunales. De regering besloot gein fusie vaan bovenaof op te lègke, meh de gemeintes op eige initiatief te doen fusere.

Nerpelt en Euverpelt kaome in 2017 euverein tot ze wouwe fusere. Op 4 november 2017 mochte alle börgers bove de twelf jaor stumme euver 'ne nuie naom. De opties waore Dommelpelt, Pelt en Pelten. Vaan de lui die kaome stumme koos 74% veur de sumpelste optie. Op 18 december käörde de bei gemeinteraode de fusie good, en mèt e decreet vaan 4 mei 2018 bekrachtegde 't Vlaoms gewes de planne.

Gemeinteraod

De börgers vaan Pelt koze op 14 oktober 2018 tegeliek mèt gans Belsj de leie vaan de nuie raod. Wie euveral in de Limbörgse Kempe steit CD&V hei bezunder sterk. De partij behaolde bekaans de hèlf vaan de stumme en 'n mierderheid vaan zetele:

Lies	perc.	Zetele
CD&V	47%	17
Samen Pelt	15,6%	5
N-VA	15,6%	4
Groen	11,2%	3
Lijst Vissers	8,1%	2
TIP	2,5%	0

Bron

Dit artikel is gebaseerd op 't corresponderend Nederlandstaoleg artikel, en wel in dees versie.

Extern links

Website vaan de gemeinte

Belsj Limburg