Frang
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
'ne Frang (Frans en Duits: Franc, Nederlands: Frank, Luxembörgs: Frang) is de naom vaan versjèllende munteinhede in Europa en de Francophonie. 't Pluraol vaan 'ne frang is frangs, 't diminutief is e frengske. Soms weurt de frang ouch op 't Mestreechs 'ne fraank geneump. De Franse frang, de Belzje frang en de Luxembörgse frang woorte bis 1999 gehanteerd es munte vaan, respectievelek, Fraankriek, Belsj en 't Land Luxembörg wie die alledrei woorte vervaange door d'n Euro. De Zweitserse frang is 'nen hendeg belaangrieke globaole munt door de aonwezegheid vaan belaangriek financieel institute in Zweitserland. In de Franstaolege ex-kolonië vaan Fraankriek woort allewijl ouch nog dèks munte gebruuk die verneump zien nao de Fraank, wie de franc CFA in Wes-Afrika.
De naom zou op force vaan versjèllende historici zien geliend aon 't Latien francorum rex (Keuning vaan de Fraanke) wat gehanteerd woort op Franse munte bis de 18e iew. Aander historici stèlle tot de naom te daanke is aon 't Frans woord franc, wat zoeget wie "openherteg" meint mer in versjèllende kontekse ouch "vrij" kin meine.
Eine frang weurt meistes verdeild in 100 centiem. 't Frans frang-symbool waor de F or Fr.; 't symbool ₣ woort gesuggereerd in Fraankriek door premier Édouard Balladur mer 't woort bekans noest gebruuk. Veur prakitsch reies gebruukde de baanke en financieel merrete de abbreviatie FF veur de Franse frang, FB veur de Belzje frang, FL (of soms Flux) veur de Luxembörgse frang, enzoewijer.