Faas Wilkes

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Servaas (Faas) Wilkes (Rotterdam, 13 oktober 1923 - aldao, 15 augustus 2006) waor 'ne Nederlandse vootballer. Heer weurt gezeen es eine vaan de beste vootballers die Nederland oets gehad heet.

Faas Wilkes kaom oet 'ne familie vaan verhuizers en woort opgeleid tot meubelmeker um 't bedrief vaan z'ne pa en noonk euver te numme. In 1941 debuteerden 'r bij Xerxes, wat toen ein vaan de topclubs vaan Nederland waor. Heer zouw tot 1949 bij die club blieve, al góng 'r haos veur MVV speule. Door e sjandal - MVV had de verhuizer twie trucks aongeboje es 'r bij hun zouw koume speule - lag de KNVB häöm bij MVV e speulverbod op, boenao Wilkes bleef speule veur Xerxes. In 1949 góng heer oetindelek nao Internazionale in Milaan, boemèt heer nao Bep Bakhuys de twiede Nederlandse vootballer waor dee veur geld nao 't boeteland góng. Dit lieverde häöm oetsleting vaan 't Nederlands èlftal op, aongezeen de KNVB vasheel aon amateurisme. In 1954 stapden 'r euver nao FC Valencia oet Spaanje. Intösse waor in Nederland ouch 't betaold vootbal opgeriech, wat veur Wilkes aonleiing waor um twie jaor later nao VVV Venlo te goon. Nao nog ei jaor in Spaanje (Levante, 1958/'59) góng 'r definitief trök nao Nederland, um zien carrière aof te bouwe bij Fortuna '54 oet Gelaen en teslotte tot 1964 bij zien aw club Xerxes. Nao zien vootbalcarrièr dreef heer mèt zien vrouw 'ne modewinkel in Rotterdam.

Faas Wilkes, 'ne midveur of rechsbinne, weurt algemein gezeen es eine vaan de beste spitse die Nederland oets gekind heet. Wilkes speulde 38 interlands veur 't Nederlands èlftal en scoorde dao-in 35 kier, e record wat tot 1998 (toen Dennis Bergkamp häöm inhaolde) bleef stoon. Heer waor befaomp um zien solo-acties en kapbeweginge, boebij heer laank de bal bij ziech hoolt en mierder speulers gewoen gemekelek veurbijleep. Veur Johan Cruyff waor heer 't groete veurbeeld. Same mèt Abe Lenstra en Kick Smit waor heer de inspiratie veur de jóngesverhaole euver de fictieve vootballer Kick Wilstra.

Extern links[bewirk | brón bewèrke]

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Faas_Wilkes&oldid=456400"